ओलीको कदमबारे दुई लाइन धार:- कांग्रेसले आज के गर्ला ?

१३ माघ, काठमाडौं । प्रधानमन्त्री केपी ओलीले प्रतिनिधिसभा विघटन गरेपछि देशव्यापी रुपमै आन्दोलनको बहार छाएको छ । ओलीको कदम असंवैधानिक हो भनेर सर्वाेच्च अदालतदेखि सबैखाले प्लेटफर्ममा विरोधको स्वर चर्केको छ । तर प्रमुख प्रतिपक्षी दल नेपाली कांग्रेसभित्र चाहिं ओली कदमबारे दुई लाइन चलेको छ ।

यसैबीच आज नेपाली कांग्रेसको स्थगित केन्द्रीय कार्यसमिति बैठक बस्दैछ । पार्टी कार्यालय सानेपामा बस्ने बैठकले ओली सरकारविरुद्ध सशक्त कार्यक्रम घोषणा गर्ने आम अपेक्षा छ । वरिष्ठ नेता रामचन्द्र पौडेललगायत महामन्त्री डा. शशांक कोइराला र पूर्व महामन्त्री कृष्णप्रसाद सिटौलासमेत ओलीविरुद्ध बलियो मोर्चा बनाउने पक्षमा देखिएका छन् ।

अहिलेको परिबेशमा विभाजित नेकपाको कुन खेमासँग मिलेर अगाडि बढ्ने भन्ने विषय नै पेचिलो बनेको छ । सभापति शेरबहादुर देउवा सकेसम्म ओलीसँगको सहयात्रा फलदायी हुने ठान्छन् । तर बहुमत सदस्य भने ओलीसँगको सहकार्य अप्राकृतिक र आत्मघाती हुने पक्षमा देखिएका छन् । स्वयं देउवा पक्षीय नेताहरुसमेत ओलीसँगको हिमचिमले राजनीतिक क्षति पुग्ने धारणा राखिरहेका छन् । यो परिवेशमा आजको बैठकले लिने निर्णय महत्वपूर्ण हुने देखिन्छ ।

निर्वाचन आयोगले सत्तारुढ नेकपा औपचारिक रुपमा विभाजित भएको मानेन । जसले गर्दा यो विवाद थप पेचिलो बन्न थालेको छ । यद्यपि चुनाव वा पुनस्थापनाको मुद्धा टुंगिएपछि भने आयोगले एउटा ठोस निर्णय नगरी सुखै छैन ।

नेकपा औपचारिक रुपमा विभाजित नभएपनि राजनीतिक रुपमा भने अब मिल्ने अवस्थामा छैन । त्यसैले एउटा पक्षसँग मिलेरै कांग्रेसले अहिलेको समस्याबाट निकास खोज्नैपर्छ । त्यसमा देउवा पक्ष वा असन्तुष्ट पक्षको आवाजले मूर्तता पाउने हो त्यसको छिनोफानो आज गर्नैपर्ने वाध्यता आइपरेको छ ।

गत पुष ५ गते ओलीले प्रतिनिधिसभा विघटन गरेलगत्तै पुष ७ गते सुरु भएको कार्यसमिति बैठक लामो समय अवरुद्ध भयो । पुष १० गते आन्दोलन गर्ने निर्णय गरेपछि स्थगित भएको बैठक पुष १९ गते बसेको थियो । त्यही बैठकको निरन्तरता हो आजको बैठक ।

आजको बैठकले ओली सरकार विरुद्ध थप आन्दोलनको कार्यक्रम ल्याउन देउवा वाहेक सबै एकमत देखिएका छन् । यद्यपि देउवा भने अझै पनि ओलीसँगै मिलेर प्रदेशदेखि सबै तहमा गठबन्धन बनाउने पक्षमा अडिग नै रहेका छन् । त्यसैले आजको बैठकले कस्तो निर्णय लेला धेरैले जिज्ञासाका साथ प्रतिक्षा गरिरहेका छन् । बैठक अहिले १ बजेका लागि तय भएको छ ।