चार वाणिज्य र दुई विकाश बैंकको त्रैमासिक रिपोर्टः कुनको नाफा कति ?

१३ माघ, काठमाडौं । यतिबेला बैंक तथा वित्तीय संस्थाहरूले आर्थिक वर्ष ०७७/८८ को दोस्रो त्रैमासको वित्तीय विवरण सार्वजनिक गरिरहेका छन् । जसमध्येमा केही वाणिज्य बैंक र विकास बैंकले रिपोर्ट सार्वजनिक गरिसकेका छन् भने केही गर्ने तयारीमा छन् ।

वाणिज्य बैंकहरुमा सिटिजन्स इन्टरनेशनल, कुमारी बैंक, इन्भेष्टमेन्ट बैंक र नेपाल बंगलादेश बैंकले दोस्रो त्रैमासको वित्तीय विवरण सार्वजनिक गरेका छन् । त्यस्तै, विकास बैंकहरुमध्येमा मुक्तिनाथ विकास बैंक र कामना सेवा विकास बैंकले रिपोर्ट सार्वजनिक गरेका छन् ।

रिपोर्ट सार्वजनिक गरेका वाणिज्य बैंकमधयेमा नेपाल इन्भेष्टमेन्ट बैंकले दोस्रो त्रैमाससम्ममा १ अर्ब ५८ करोड ६६ लाख खुद मुनाफा कमाउन सफल भएको छ । बैंकले गत आर्थिक वर्षकाे यही अवधिमा १ अर्ब ६६ करोड मुनाफा गरेको थियो । यो गत आर्थिक वर्षको तुलनामा ४.७७ प्रतिशतले कमी हो ।

कुमारी बैंकले दोस्रो त्रैमाससम्ममा १ अर्ब २१ करोड खुद मुनाफा आर्जन गरेको छ । बैंकले गतबर्ष यही समयमा तुलनामा ४१ करोड ३५ लाख रुपैयाँ अर्थात ५१.४९ प्रतिशत मुनाफा बढाएको हो ।

सिटिजन्स इन्टरनेशनल बैंकले चालू आर्थिक वर्षको दोस्रो त्रैमाससम्ममा ८७ करोड ५१ लाख खुद मुनाफा आर्जन गरेको छ । बैंकले गत वर्ष यही समयमा ६८ करोड ७७ लाख खुद मुनाफा कमाएको थियो । जुन गत वर्षको तुलनामा आर्थिक वर्ष २७ प्रतिशतले बढी हो ।

नेपाल बंगलादेश बैंकले आज मंगलबार  दोस्रो त्रैमासको विवरण सार्वजनिक गरेको छ । बैंकले चालू आर्थिक वर्षको दोस्रो त्रैमाससम्मा ९४ करोड १२ लाख खुद मुनाफा आर्जन गरेको छ । यो गत आर्थिक वर्षको सोही अवधिको तुलनामा १६.५२ प्रतिशत बढी हो । गत आर्थिक वर्षको सोही अवधिसम्ममा बैंकले ८० करोड ७७ लाख रुपैयाँ खुद मुनाफा कमाएको थियो ।

कुन कुन विकास बैंकले सार्वजनिक गरे दोस्रो त्रैमासको वित्तीय विवरण

दोस्रो त्रैमासको वित्तीय विवरण सार्वजनिक गर्नेमा मुक्तिनाथ विकास बैंक र कामना सेवा विकास बैंक रहेका छन् । मुक्तिनाथ विकास बैंकले चालू आर्थिक वर्षको दोस्रो त्रैमाससम्मा ६१ करोड ५५ लाख खुद मुनाफा आर्जन गरेको छ । बैंकले गत बर्ष यही समयमा ४७ करोड २५ लाख मुनाफा गरेको थियो । जुन गत वर्षको तुलनामा आर्थिक वर्ष ३० प्रतिशतले बढी हो ।

कामना सेवा विकास बैंकले चालू आर्थिक वर्षको दोस्रो त्रैमाससम्म ३९ करोड ४८ हजार खुद मुनाफा गरेको छ । बैंकले गत वर्ष यही समयमा १४ करोड ८५ लाख मुनाफा गरेको थियो । जुन गत वर्षको तुलनामा आर्थिक वर्ष १६३ प्रतिशतले बढी हो ।