वामदेवले थाले एकता अभियान

१४ माघ, काठमाडौं । नेपाली राजनीतिमा सधैं विवादास्पद मानिने नेता हुन्–वामदेव गौतम । अस्थिर स्वभाव उनको परिचय हो । नेकपाका उपाध्यक्षसमेत रहेका गौतम विवादका बेला सधैं अस्थिर देखिए । केपी ओली र पुष्पकमल दाहाल ‘प्रचण्ड’बीचको लडाईंमा गौतम दिउँसो एउटा मोर्चामा हुन्थे भने साँझ फर्लक्क पल्टिन्थे । त्यसैले उनीकै कारण पार्टीले एउटा सोझो बाटो लिन सकेन ।

साँझ भैंसेपाटी गठबन्धन बनाउने गौतम बालुवाटार पुगेपछि भने कित्ता फेर्न तयार देखिन्थे । त्यसैको प्रभावले गर्दा ओलीले यत्रो प्रतिगमन गर्ने आँट र भरोशा पाएका हुन् । प्रतिनिधिसभा विघटन गरिसकेपछि नेकपा दुई फ्याक भयो । तर गौतम भने कतै खुलेका छैनन् ।

हिजै मात्र उनले जसले अध्यक्ष पद दिन्छ त्यतै जाने भनेको समाचार आयो । यद्यपि साँझ उनको सचिवालयले त्यसको खण्डन गरेको छ । तर गौतमलाई नजिकबाट चिन्नेहरु भन्छन्–पद बिनाको वामदेव कतै जाँदैनन् । त्यसैले उनले अध्यक्ष पद मागेको हुनसक्छ ।  तर गौतम भने अझैपनि आफू पार्टी एकताकै पक्षमा लड्ने भन्दै अभियान चलाउन अग्रसर भएका छन् । आज उनले आफ्नो अभियानको थालनी गरेका छन् ।

पार्टी एकता राष्ट्रिय अभियान नाम दिइएको उनको अभियान कत्तिको सार्थक होला,त्यो त आउने दिन प्रष्ट होला नै । तर गौतमको स्वभाव र चरित्र हेर्दा यो पनि एउटा फण्डा मात्र हो भन्ने धेरै छन् । आज ललितपुरस्थित सिद्धार्थ कटेजमा गौतमले यो अभियानको थालनी गरेका छन् । उनले चलाएको उक्त अभियानमा आज केही वाम नेता सहभागी भए । तर जनताले चिनेका नेताहरु भने कोही पुगेनन् ।

विगतमा गौतमसँगै निकट रहेका एक नेताले भने– वामदेवजी कतिबेला कोसँग सम्झौता गर्न तयार हुनुहोला अरु सबै रमिते हुनेछन् । कुनैपनि बेला राम्रो अफर आउने वित्तिकै अभियान त्यागेर सम्झौता गर्ने गौतमको स्वभावबाट ती नेता आजित छन् । त्यसैले आफ्नै विवेकले भने अनुसार, प्रचण्ड–माधव समूहमा लागेर क्रान्ति जोगाउने अभियानमा छन् ।

आजको एकता अभियानमा गौतमका साथ नेकपा केन्द्रीय सदस्य हरि पराजुली,कीर्तिपुर नगरपालिका प्रमुख रमेश महर्जन,पूर्व सांसद् माया ज्ञवालीलगायत केही नेता देखिएका छन् ।