अर्बपति क्लबमा पुग्यो कुमारी बैंक ! लिडर बैंक बन्ने यात्रामा

माघ १५, काठमाडौं । देव विकास बैंकलाई गाभेर वाणिज्य बैंकको लिडर बैंक बन्न हिडेको कुमारी बैंकले आर्थिक वर्षको दोश्रो त्रैमासमा सबैको मन खुशी बनाउने खालको वित्तीय प्रतिवेदन प्रस्तुत गरेको छ ।  बैंक संचालक समितिको अध्यक्षमा अमिर प्रताप ज.ब. राणा रहेका छन् भने संचालक समिति सदस्यहरुमा कृष्णप्रसाद ज्ञावाली, महेशप्रसाद पोखरेल, अनुराधा चौधरी, डा. गणेशप्रसाद पाठक रहेका छन् ।

त्यस्तै बैंककाे उच्च व्यवस्थापनमा प्रमुख कार्यकारी अधिकृत (सीईओ) सुरेन्द्र भण्डारी रहेका छन् भने अनुजमणि तिमिल्सिना वरिष्ठ उप-प्रमुख कार्यकारी अधिकृत छन् । त्यस्तै मनिष तिमिल्सिना उप-प्रमुख कार्यकारी अधिकृत छन् ।

सफल बैंकर भण्डारीलाई कुमारी बैंकले आफ्नो स्थापनाकालमा पनि सीईओको जिम्मेवारी दिएको थियो । कुमारी बैंक बुझेको र कुमारी बैंकलाई निकै माया गर्ने प्रमुख कार्यकारी अधिकृतको रुपमा बैंकलाई नजिकबाट हेर्ने व्यक्तिहरुले भण्डारीकाे चर्चा गरेको सुनिन्छ ।

बैंककाे विगत ४ वर्षको लाभांशलाई हेर्दा आर्थिक वर्ष ०७७/७८ मा सर्वाधिक लाभांश दिएको छ । कम्पनी भित्रको सुशासन पनि राम्रो देखिएको छ । कम्पनीले समयमै अर्थात मंसिर २९ गते आफ्नो वार्षिक साधारणसभा सम्पन्न गर्दै लाभांश वितरण गरेको छ । कोरोना कहरका बीच पनि लगानीकर्ताको मन जित्दै र आक्रामक व्यापार गर्ने बैंक व्यवस्थापन सफल भएको देखिन्छ ।  अब छिटै नै केही वर्षमा बैंक लिडर बैंक बन्ने दाउमा रहेको छ । अनुभवी र बैंकलाई निकै माया गर्ने व्यवस्थापन र व्यवस्थापनलाई दवाव बिना खुलेर काम गर्न दिने संचालक समितिले गर्दा बैंकको सो लक्ष्य पुरा हुने छाँटकाँट देखिएकाे छ ।

कस्तो आयो आर्थिक वर्ष ७७/७८ दोश्रो त्रैमासको वित्तीय प्रतिवेदन :
कुमारी बैंकले चालु आर्थिक वर्षको दोश्रो त्रैमास अर्थात ६ महिनाको अवधिमा बैंकले १ अर्ब २१ करोड खुद मुनाफा गरेकोमा अघिल्लो आर्थिक वर्षको दोश्रो त्रैमाससम्ममा बैंकले ८० करोड ३० लाख खुद मुनाफा गरेको थियो । यसरी खुद मुनाफामा ५१ प्रतिशतको वृद्धि भएको छ ।

प्रमुख आम्दानीको श्रोत (खुद व्याज आम्दानी):
अघिल्लो आर्थिक वर्षको दोश्रो त्रैमासमा कम्पनीले १ अर्ब ८२ करोड खुद व्याज आम्दानी गरेकोमा चालु आर्थिक वर्षको दोश्रो त्रैमाससम्म कम्पनीले २ अर्ब ४९ करोड खुद व्याज आम्दानी गरेको छ । यसरी खुद व्याज आम्दानीमा ३७ प्रतिशतको वृद्धि भएको छ । त्यस्तै, संचालन मुनाफा ५३ प्रतिशतले वृद्धि हुँदै १ अर्ब ७४ करोड पुगेको छ । अघिल्लो वर्षको दोश्रो त्रैमासमा कम्पनीले १ अर्ब १३ करोड संचालन मुनाफा गरेको थियो ।

गत आर्थिक वर्षको दोश्रो त्रैमास सम्म बैंकले १३ करोड रकम  जोखिम बापत व्यवस्थापन गरेकोमा चालु आर्थिक वर्षको दोश्रो त्रैमाससम्म बैंकले सो शिर्षकमा ४ करोड फिर्ता गरेको तथ्यांकमा देखिएको छ । कम्पनीको खुद मुनाफामा गैरसंचालन मुनाफाको हिस्सा निकै थोरै १  करोड ७८ मात्र रहेको छ ।

प्रतिशेयर आम्दानी  :

कम्पनीको वार्षिक प्रतिशेयर आम्दानी १७ रुपैयाँ ५३ पैसा हुन आउँछ।

नोट : माघ १५  गतेको बजार मुल्यको आधारमा

किताबी मूल्य कति ?
कम्पनीको किताबी मूल्य ( प्रतिशेयर नेट्वर्थ) १३० रुपैयाँ आउँछ ।

निक्षेप, कर्जामा कस्तो :
कम्पनीले चालु आर्थिक वर्षको दोश्रो त्रैमाससम्म १ खर्ब  २२ अर्ब निक्षेप संकलन गरी १ खर्ब १४ अर्ब कर्जा प्रवाह गरेको छ । आर्थिक वर्ष ०७६/७७ को असार मसान्त र अहिलेको तथ्यांकलाई दाँजेर हेर्दा कम्पनीको निक्षेप संकलन ५ प्रतिशतले वृद्धि भएको छ भने कर्जा प्रवाह ४  प्रतिशतले नै वृद्धि भएको छ ।

जगेडा कोषको अवस्था :
जगेडा कोष २३ प्रतिशतले वृद्धि हुँदै ३ अर्ब ५० करोड पुगेको छ भने संचित मुनाफा प्रतिशतले घट्दै ६८ करोड ५१ लाख रुपैयाँ रहेको छ ।

निस्क्रिय कर्जा :
कम्पनीको खराब कर्जा १ दशमलव ०६ प्रतिशत रहेको छ । अघिल्लो आर्थिक वर्षको दोश्रो त्रैमासमा खराब कर्जा १ दशमलव ०४ प्रतिशत थियो ।

आधार व्याजदर :
बैंकको आधार व्याजदर केही  घट्दै ७  दशमलव  ९२ प्रतिशत पुगेको छ । यसरी आधार व्याजदर ८ प्रतिशत मुनि हुनुले बैंकले आफ्ना कर्जा  ग्राहकको लागि धेरै सहयोग गरेको बुझ्न सकिन्छ ।

स्प्रेडदर :
व्याजदर अन्तर ३ दशमलव  ५८ प्रतिशत छ । अघिल्लो आर्थिक वर्ष सोही अवधिमा स्प्रेडदर ४ दशमलव ३७ प्रतिशत थियो ।

कम्पनी र दोश्रो बजार :
मूल्य आम्दानी अनुपात १६ गुणा :
कम्पनीको माघ १५ गतेको बजार मूल्य २९२ लाई आधार मान्दा कम्पनीको मूल्य आम्दानी अनुपात १६ दशमलव ७७ गुणा आउँछ ।

पीबी रेसियो :

कम्पनीको बजार मूल्य २९२ लाई आधार मान्दा बजार मूल्य र किताबी मूल्यको अनुपात २ दशमलव २३ गुणा रहेको छ।

निष्कर्ष :

कुमारी बैंक लिडर वाणिज्य बैंकको रुपमा स्थापित  हुँदै गएको देखिन्छ । प्रमुख आम्दानीको श्रोतको रुपमा रहेको खुद व्याज आम्दानीमा पनि आकर्षक वृद्धि भएको र त्यसको सकारात्मक असर कम्पनीको खुद मुनाफामा देखिन्छ । बैंकले देव विकास बैंकलाई एक्वायर गरे पश्चात बैंक लिडर बैंकको रुपमा स्थापित हुन खोजेको प्रस्ट देखिन्छ ।