सप्तरीमा एकै दिन १४६ जनाले लगाए कोरोना बिरुद्धको खोप

धीरुभाइ

१५ माघ, सप्तरी । सप्तरीमा कोरोना भाइरस संक्रमण बिरुद्ध खोप अभियान अन्तर्गत १४६ जनाले खोप लगाएका छन । सो अभियानको लागि जिल्लामा राजविराज स्थित गजेन्द्र नारायण सिंह अस्पताल र रुपनी गाउँपालिका स्थित ठाकोदेबी जोगेन्द्र भगत प्रहरी अस्पतालमा खोप केन्द्र सञ्चालन गरेको छ ।

ती दुबै खोप केन्द्रमा गरी बुधबार १४६ जनालाई खोप लगाएको स्वास्थ्य कार्यालय सप्तरीका निमित कार्यालय प्रमुख दुनियालाल यादवले जानकरी दिए । जिल्लामा पहिलो चरणमा तीन हजार ७५४ जनालाई खोप लगाउने योजना रहेको छ । सोही संख्यामा खोपमा खोप उपलब्ध रहेको बताइएको छ ।

गजेन्द्र नारायण सिंह अस्पतालका स्टाफ नर्स सुनिताकुमारी यादवले पहिलो खोप लगाएका छन भने त्यसपछि अस्पतालका निमित मेडिकल सुपरिटेन्डेन्ट डा. रणजीतकुमार झा, स्वास्थ्यकर्मीहरु ममताकुमारी यादव, कृष्णचन्द्र मिश्रा, चन्द्रबहादुर खवास, घनश्याम यादव लगायतले खोप लगाएको अस्पतालले जनाएको छ । खोप लगाउन अस्पतालका चिकित्सक, कर्मचारी, स्वास्थ्यकर्मी, एम्बुलेन्स चालक, सरसफाइकर्मीसहित २१६ जनाको नाम दर्ता भएकोमा पहिलो दिन ४४ जना पुरुष र ३१ जना महिला स्वास्थ्यकर्मीलाई खोप लगाएको निमित मेसु झाले जानकारी दिए ।

त्यस्तै रुपनी स्थित प्रहरी अस्पताल केन्द्रबाट ६५ जनाले खोप लगाएको छ । खोप लगाएकाहरुमा हालसम्म कुनै प्रकारको साइड इफेक्ट नदेखाएको उनले बताए । खोप लगाएपछि कुनै प्रतिक्रिया देखाएमा त्यसको व्यवस्थापनको लागि स्वास्थ्यकर्मीहरु तयारी अवस्थामा राखिएको बताइएको छ ।

यसअघि प्रदेश २ का सामाजिक विकास मन्त्री नवलकिशोर साहले ती दुबै स्थानमा अभियानको एक समारोहबीच उद्घाटन गरे । उद्घाटन समारोहलाई सम्बोधन गर्दै मन्त्री साहले कोरोना भाइरस विरुद्धका खोप जीवनरक्षाका लागि सुरक्षित भएकोले नडराइ निर्धक्क भएर लगाउन सबैसँग आग्रह गरे । खोपबारे विभिन्न भ्रामक हल्ला चलाइएको प्रंसङ्ग उल्लेख गर्दै उहाँले त्यस्तो हल्लाको पछाडी नलाग्न समेत आग्रह गरे ।

त्यस्तै कार्यक्रममा गजेन्द्र नारायण सिंह अस्पतालका निमित मेडिकल सुपरिडेन्डेन्ट डा. रणजीत झाले भारतमा परिक्षण भइसकेर आएको खोपले कुनै नराम्रो घटना भइहाल्छ भन्ने सोच्नु र आत्तिनु नपर्ने बताए ।

भारत सरकारले पहिलो पटक १० लाख डोज कोभिशिल्ड खोप नेपाल सरकारलाई उपहार स्वरुप उपलब्ध गराएपछि देशैभर एकैदिन कोरोनाविरुद्धको खोप लगाउने अभियान सुरु भएको हो । जिल्लामा हालसम्म कोरोना संक्रमणबाट ४१ ज्यानको मृत्यु भइसकेको छ भने एक हजार ८३० जनामा पोजेटिभ भेटिएको थियो । अहिले जिल्लामा सक्रिय संक्रमितको संख्या शुन्य रहेको छ ।