पोखरेल चढेको गाडीलाई अवरोध, तीन जना प्रदर्शनकारी घाइते

१९ माघ, काठमाडौं । नेकपा ओली समूहको कार्यक्रममा सहभागी हुन नुवाकोट पुगेका उपप्रधानमन्त्री ईश्वर पोखरेल चढेको गाडीलाई अवरोध भएको छ ।

मन्त्रीहरूलाई कालोझण्डा देखाउने कार्यक्रम अन्तर्गत नेकपा प्रचण्ड–नेपाल समूहका कार्यकर्ताले पोखरेललाई नुवाकोटको बट्टारमा कालो झण्डा देखाउँदै गाडी रोकेर अवरोध गरेका थिए ।

पोखरेलको गाडीलाई अवरोध भएपछि ओली र प्रचण्ड–नेपाल दुवै पक्षबीच केहीबेर अघि सामान्य झडप समेत भएको छ । पार्टी विभाजनपछि ओली र प्रचण्ड–नेपाल दुवै पक्ष एकअर्काविरुद्ध आक्रामक देखिएका छन् ।

घटनापछि प्रहरीले स्थितिलाई नियन्त्रणमा लिन बल प्रयोग गरेको थियो, जसमा तीन जना प्रदर्शनकारी घाइते भएका छन् । हाल स्थिति नियन्त्रणमा आइसकेको र मन्त्री पोखरेल कार्यक्रममा सहभागी भइसकेको प्रहरीले जनाएको छ ।