म्यानमारको सैन्य ‘कू’ ले संसारमै लोकतन्त्रमाथि थप चुनौती : नेता गुरुङ

२० माघ, काठमाडौं । नेपाली कांग्रेसका केन्द्रीय सदस्य एबम युवा नेता धनराज गुरुङले म्यानमारको सैन्य ‘कू’ ले संसारमै लोकतन्त्रमाथि थप चुनौती थपेको जनाएका छन् । उनले सामाजिक संजाल ट्वीटरमा ट्वीट गर्दै उनले निरङ्कुश ओलीतन्त्रको बिरुद्ध आन्दोलनको आँधीवेहरी ल्याउन समेत ढिला नगर्न सार्बजनिक अपील गरेका हुन्।

म्यानमारमा सेनाले ‘कु’ गर्दै सत्ता हत्याएको छ । सोमबार बिहान सेनाले नेसनल लिग फर डेमोक्रेसी ‘एनएलडी’ की नेतृ आङ सान सु कीलाई गिरफ्तार गर्दै सत्ता नियन्त्रणमा लिएको हो । यसैबीच, उनले सामाजिक संजाल ट्वीटरमा ट्वीट गर्दै नेपालमा ओली सरकारको असंवैधानिक कदम र अमेरिकामा ट्रम्पको बलजफ्ती तमासा पछि म्यानमारको सैन्य ‘कू’ ले संसारमै लोकतन्त्रमाथि थप चुनौती देखिएको भन्दै उक्त अपील गरेका हुन् ।

उनको ट्वीटमा लेखेका छन्, “नेपालमा ओली सरकारको असंवैधानिक कदम र अमेरिकामा ट्रम्पको बलजफ्ती तमासा पछि म्यानमारको सैन्य ‘कू’ ले संसारमै लोकतन्त्रमाथि थप चुनौती देखियो। यस संदर्भमा म्यानमारको सैन्य ‘कू’ को सशक्त बिरोध गरौं साथै नेपालको निरङ्कुश ओलीतन्त्रको बिरुद्ध आन्दोलनको आँधीवेहरी ल्याउन ढिला नगरौं।”

सेनाले म्यानमारकी स्टेट काउन्सिलर तथा विदेशमन्त्रीसमेत रहेकी सु कीसहित राष्ट्रपति विन मिन्टलगायतका नेतालाई पनि हिरासतमा लिएको  छ । नेताहरुलाई पक्राउ गरेको केही घण्टापछि सेनाले टेलिभिजनमार्फत म्यानमारको सत्ता आफ्नो नियन्त्रणमा रहेको र एक वर्षका लागि संकटकाल घोषणा गरिएको जनाएको छ । सेनाले म्यानमारको सत्ता सेनाप्रमुख मिन आङ ह्लाइङलाई सुम्पिएको जनाएको छ ।

सन् २००८ को संविधानअनुसार म्यानमारको संसद्मा सेनालाई २५ प्रतिशत सिट छुट्याइएको छ । सु की प्रशासनमै पनि सेनाले तीन वटा महत्त्वपूर्ण मन्त्रालयको जिम्मेवारी पाएको थियो । म्यानमारमा सन् २०११ सम्म सेनाले प्रत्यक्ष रुपमा शासन गरेको थियो । उक्त समयमा सुकीलाई लामो समय घरमै नजरबन्दमा राखिएको थियो । उनलाई सन् १९८९ देखि २०१० सम्म नजरबन्दमा राखिएको थियो ।

सुकी म्यानमारका स्वतन्त्रता सेनानी जनरल आङ सानकी छोरी हुन् । उनी मानव अधिकार र अभिव्यक्ति स्वतन्त्रताका लागि लड्ने व्यक्तिका रुपमा विश्वमै परिचित छिन् । प्रजातन्त्रको पुनस्स्थापना र मानव अधिकारका लागि अहिंसात्मक तवरले लड्दै आएको भन्दै उनलाई सन् १९९१ मा नोबेल शान्ति पुरस्कार पनि दिइएको थियो ।