चर्चित पत्रकार राजेन्द्र अधिकारी पक्राउ, अभद्र व्यवहारको मुद्धामा हतकडी !

२० माघ, पोखरा । पत्रकार पत्रकारबीच भएको सामान्य विवादलाई लिएर कास्की प्रहरीले पोखराका चर्चित पत्रकार राजेन्द्र अधिकारीलाई पक्राउ गरेको छ । पत्रकार रामकृष्ण ज्ञवालीलाई अभद्र व्यवहार गरेको आरोपमा उनलाई पक्राउ गरिएको प्रहरीले जनाएको छ । सत्तारुढ दल निकट पत्रकारका रुपमा चिनिने ज्ञवालीको उजुरीका आधारमा पत्रकार अधिकारीलाई प्रहरीले अभद्र व्यवहारको मुद्धा लगाएको हाे ।

सो मुद्दामा आज जिल्ला प्रशासन कार्यालय कास्कीले पाँच दिन म्याद थप गरेपछि उनी प्रहरी हिरासतमा पुगेका छन् । आज बिहान ११ बजे पोखराको शान्तिनगरस्थित पत्रकार अधिकारीकै निवासबाट पक्राउ परेका थिए । कास्की प्रहरीले उनलाई हतकडी नै लगाएर जिल्ला प्रशासन कार्यालय पेश गरेकोमा पत्रकार तथा नागरिक समाजले आपत्ति जनाएका छन् ।

तर पत्रकार राजेन्द्र अधिकारीले आफ्नो र परिवारको जीवन बर्बाद हुने गरि पत्रकार ज्ञवालीले सामाजिक सञ्जालमा बदनाम गरेको विषयमा विवाद हुँदा धकेलाधकेल भएको बताएका छन् । अधिकारीलाई अहिले जिल्ला प्रहरी कार्यालय कास्कीको हिरासतमा राखिएको छ । पत्रकार अधिकारी पोखराको चर्चित पत्रिका डनन्यूजका प्रधानसम्पादक हुन् । उनले हालै डनन्युजलाई अनलाइन संस्करणमा परिवर्तन गरेका छन् ।

इमान्दार र साहसिक पत्रकारको छवि बनाएका अधिकारी खोजमुलक पत्रकारितामा दख्खल राख्छन् । समाजमा भएका विकृति र विसंगतिप्रति कडा रुपमा प्रस्तुत हुने उनी नेपाल पत्रकार महासंघ कास्कीका पूर्व उपाध्यक्ष समेत हुन् ।

सामाजिक सञ्जालमा उनको तुरुन्त रिहाईको माग गरिएको छ भने पत्रकार महासंघ तथा अन्य पत्रकारसम्बद्ध संघसंस्थाहरुले दुई पत्रकारबीच मध्यस्थता गर्नुपर्ने आवाज उठेको छ ।