सिमसारको संरक्षणमा जुट्न आवश्यक छ : मुख्यमन्त्री गुरुङ

२० माघ,गण्डकी । गण्डकी प्रदेशका मुख्यमन्त्री पृथ्वीसुब्बा गुरुङले पानी र सिमसार क्षेत्रको संरक्षण, व्यवस्थापन र बुद्धिमतापूर्वक उपयोगका लागि हार्दिक अपिल गरेका छन् । विश्व सिमसार दिवसका अवसरमा गण्डकी प्रदेश राजधानी पोखरामा आज आयोजित कार्यक्रममा आफ्नो सन्देशमार्फत गुरुङले सिमसार क्षेत्र जैविक विविधताले सम्पन्न रहने र पानीमा रहेका प्रदूषण र फोहोरमैलालाई छाँदेर पृथ्वीको सतहलाई स्वच्छ र स्वस्थ राख्ने बताएका छन् ।

स्वच्छ र स्वस्थ सिमसार क्षेत्रले प्रकृति र संस्कृतिलाई बचाएर राख्नुपर्नेमा जोड दिँदै उनले मौसमलाई सफा राख्न र पानीको चक्रलाई नियमित राख्न सिमसार क्षेत्रको महत्वपूर्ण भूमिका रहने भएकाले यसको उचित व्यवस्थापन र संरक्षणमा लाग्न आग्रह समेत गरेका छन् ।

गण्डकी प्रदेशमा भएका तालको संरक्षण गर्ने, विकास गर्ने र त्यहाँबाट उत्पादन हुने वातावरणीय सेवा र वस्तुको सतत उपयोग गर्ने उद्देश्यले हामीले गण्डकी ताल संरक्षण तथा विकास प्राधिकरणसमेत गठन गरी काम पनि शुरु गरिसकेको अवगत गराउँदै मुख्यमन्त्री गुरुङले भनेका छन्, “अन्तर्राष्ट्रिय महत्व भएका पोखरा उपत्यकाका नौ वटा ताललाई रामसार सूचीमा सूचीकृत गर्न सक्नु हामी प्रदेशवासीका लागि खुशीको खबर हो ।”

उनले फेवातालको चार किल्ला निर्धारण गर्न, सीमाङ्कन र नक्साङ्कन गर्न एउटा समिति बनाएर प्रदेश सरकारले कामको थालनी गरिसकेको उल्लेख गरेका छन् । गर्नुभयो । ताल संरक्षण गर्न सरकारको एक्लो प्रयासले मात्र पुग्दैन । यसका लागि निजी क्षेत्र मुख्य गरी पर्यटन व्यवसायी, नागरिका समाज र सञ्चार क्षेत्रको पनि ठूलो भूमिका हुन्छ सिमसार क्षेत्र संरक्षणका लागि सबैको साथ र सहयोग अपरिहार्य भएको गुरुङले बताएका छन् ।