गोंगबुमा रोकिराखेको ट्याक्सीमा आगजनी

२२ माघ, काठमाडौं । नेकपाको दाहाल-नेपाल समूहका कार्यकर्ताले गोंगबुमा एक ट्याक्सीमा आगजनी गरेका छन् । गोंगबुमा रोकिराखेको कुम्भनारायण श्रेष्ठको प्रदेश ३-०१-००२ ज ५८८१ नम्बरको ट्याक्सीमा दाहाल-नेपाल समूहका कार्यकर्ताले आगजनी गरेका हुन् ।

बिहान ५ बजे ट्याक्सीमा आगजनी गरेका दुई जना फरार रहेका महानगरीय प्रहरी परिसर काठमाडौंका प्रमुख एसएसपी अशोक सिंहले बताए । ट्याक्सीमा लगाएको आगो दमकल बोलाएर निभाइएको सिंहले जानकारी दिए । ट्याक्सी जलाउनेको खोजी भइरहेको प्रहरीले जनाएको छ ।

 संवैधानिक निकायहरुमा बलमिच्याई गर्दै नियुक्ति गरेको भन्दै नेकपा (प्रचण्ड–नेपाल खेमा) बिहीबार आम हड्तालको आह्वान गरेको हो ।सरकारको सिफारिसमा राष्ट्रपति विद्यादेवी भण्डारीले बुधबार अख्तियार दुरुपयोग अनुसन्धान आयोग, निर्वाचन आयोग लगायतका संवैधानिक निकायहरुमा नियुक्ति गरेका थिए ।

सरकार र राष्ट्रपति मिलेर असंवैधानिक र गैरकानूनी रुपमा संवैधानिक निकायहरुमा नियुक्ति गरेको भन्दै प्रचण्ड–नेपाल समूहले आकश्मिक रुपमा आम हड्ताल गर्ने घोषणा गरेको हो । यसैबिच गृह मन्त्रालयले बन्द गराउनेलाई कारवाही गर्ने चेतावनी पनि दिएको छ ।