गृहसचिव र डीआईजी सरुवाको तयारी

२६ माघ, काठमाडौं । सरकारले निर्वाचन घोषणा गरेपछि गृहसचिव हेरफेर गर्ने तयारी गरेको छ । अन्य सचिवहरुको सरुवासँगै गृहसचिवलाई पनि सरुवा गर्ने तयारी भएकाे हो । सर्वोच्च अदालतमा संसद विघटन सम्बन्धी मुद्धा विचाराधीन रहेको अवस्थामै सचिवहरुको सरुवा गर्ने तयारी गरिएको स्रोतले जनाएको छ ।

प्रधानमन्त्री कार्यालयले गृह मन्त्रालयको सचिवमा एकनारायण अर्याललाई ल्याउने तयारी  गरेकाे छ । तर, गृहमन्त्री रामबहादुर थापाले भने सूर्य गौतमलाई ल्याउन पहल गरिरहेका छन् । अर्याल प्रधानमन्त्रीसँग निकट रहेकाले गृहमा आउन खोजिरहेका छन् । तर, गृहमन्त्रीले भने अर्यालको साटोमा सार्वजनिक खरिद ऐनमा रहेका गौतमलाई ल्याउने तयारी गरेका हुन् ।

त्यस्तै सरकारले सातै प्रदेशका प्रहरी प्रमुख हेरफेरको गृहकार्य भइरहेको स्रोत बताउँछ । हाल प्रदेश नम्बर १ मा ईश्वरबाबु कार्की, २ मा धीरजप्रताप सिंह, बागमतीमा बसन्त लामा, गण्डकीमा घनश्याम अर्याल, लुम्बिनीमा रबिन्द्र धानुक, कर्णालीमा बसन्त पन्त तथा सुदुरपश्चिममा उत्तम सुवेदी छन् ।

उनीहरुमध्ये रबिन्द्र धानुक कमाउने अभियानमा रहेकाले उनीविरुद्ध धेरै उजुरीसमेत परेकाे बताइएकाे छ । प्रदेशमा उनीहरुको १० महिना मात्र पुगेपनि पछि चुनावको मुखमा सरुवा गर्न नमिल्ने भएकाले अहिले नै सरुवाको तयारी भएको हो ।

प्रधानमन्त्री ओलीले आफू अनुकुलका डीआईजीलाई प्रदेशमा पठाउने तयारी गरेका छन् । जसमा सहकुल थापा, अरुण बिसी, प्रकाशजंग कार्की प्रमुख दाबेदार छन् । त्यस्तै हालै बढुवा भएका पुरुषोत्तम कँडेल, गणेश ऐर, दिवेश लोहनी, डा. देवबहादुर बोहरालगायत पनि प्रदेश जान चाहेका छन् ।

डीआईजी धानुकले दाङबाट गोरु तस्करीलाई प्रश्रय दिएका कारण उनको सरुवा तयारी भएको हो । प्रहरी निरीक्षक हुँदै लाखौ रुपैयाँ घोटलामा कारवाहीमा मात्र होइन निलम्बनमै परेका डीआईजी धानुकविरुद्ध अख्तियार दुरुपयोग अनुसन्धान आयोगमा  समेत उजुरी परेको हो ।