फुल्चोकी जंगलमा हराइरहेका २ जनालाई भेटियो

२६ माघ,काठमाडौं । ललितपुरको गोदावरी नगरपालिका ३ स्थित फुल्चोकी जंगलमा हराइरहेका २ जनालाई प्रहरीले उद्दार गरेको छ । उनीहरुलाई प्रहरीले सकुशल उद्दार गरेको हो ।

फुल्चोकी जंगल घुम्न गएका काठमाडौं कलंकी बस्ने सिन्धुली सुनकोशी गाउँपालिका ६ घर भएका २१ वर्षीय प्रशान्त थापा र दोलखा मुलुं गाउँपालिका ३ घर भएका १९ वर्षीय सुरेश केसी हराएका थिए ।

उनीहरु हराएको सुचना प्राप्त गरेपछि महानगरीय प्रहरी प्रभाग बाँडेगाउँ ललितपुरबाट खटिएको प्रहरीले खोजी गरेको थियो । उनीहरुलाई प्रहरीले गोदावरी नगरपालिका २ चापाखर्कमा अलपत्र रहेको अवस्थामा उद्दार गरी अभिभावकको जिम्मा लगाएको छ ।

जाडो समयमा हिउँ पर्ने कारण आन्तरिक पर्यटकको अत्यधिक घुँइचो हुने र बाटो बिराइ मानिसहरु हराउन गई मृत्यु समेत हुने गरेको बिगतको घटनाहरुलाई मध्यनजर गरी महानगरीय प्रहरी प्रभाग बाँडेगाउँले फुल्चोकी प्रवेशको मुख्य नाका गोदावरी बसपार्क नजिकै जाँच, पर्यटक बिबरण ईन्ट्रीलगायत गर्दै आएको छ ।