एनआरएनएको नयाँ सदस्यता तथा सदस्यता नवीकरणका लागि संघको आग्रह

२६ माघ, काठमाडौं । गैरआवसीय नेपाली संघ राष्ट्रिय समन्वय परिषद अमेरिकाको महाधिवेशन छिट्टै हुने भएको छ । आगामी २०२१–२०२३ कार्यकालको लागि हुन गइर्रहेको महाधिवेशनमा सक्रिय सहभागिता जनाउन संघले सदस्यता नविकरण र नयाँ सदस्यता वितरण गर्न शुरु गरेको छ ।

संघले यही फेब्रुवरी १५ तारीख २०२१ सम्म मात्र सदस्यता नवीकरणको म्याद भएकाले तोकिएको समय भित्रै सदस्यता लिन संस्थामा आबद्ध शुभेच्छुक, शुभचिन्तक, साधारण एवं क्रियाशील सदस्यहरू र अमेरिकाबासी सम्पूर्ण नेपाली दिदीबहिनी तथा दाजुभाइहरूमा नेपाली जनसम्पर्क समिति अमेरिकाले विज्ञप्तिमार्फत अपिल गरेको छ ।

फेब्रुवरी ७ तारीख २०२१ आइतबारका दिन नेपाली जनसम्पर्क समिति अमेरिकाका सभापति आनन्द बिष्टको अध्यक्षतामा समितिका सल्लाहकार, च्याप्टरका सभापति, अमेरिकामा रहेका नेका केन्द्रीय विभागका सदस्यहरू र कार्यसमितिको संयुक्त जुम बैठकले एनआरएनएको नयाँ सदस्यता लिन तथा सदस्यता नवीकरणका लागि सबैलाई अनुरोध गर्ने निर्णय गरेको नेपाली जनसम्पर्क अधिवेशन तयारी समिति अमेरिकाका महासचिव मुनिन्द्र नेम्बाङले जनाएका छन् ।

सो विज्ञप्तिमा भनिएको छ, “गैरआवसीय नेपाली संघ राष्ट्रिय समन्वय परिषद अमेरिकाको आगामी २०२१–२०२३ कार्यकालको लागि सदस्यता नविकरण तथा नयाँ सदस्यता वितरण भईरहेको कुरा हामी सबैमा अवगत नै छ । गैरआवसीय नेपालीको हक अधिकारको बारेमा र समग्र नेपालीहरूको सरोकारको बिषयहरूमा आवाज उठाउने एउटा आधिकारिक साझा संस्था भनेको एनआरएनए नै हो । त्यसैले यस संस्थाबाट नीतिगत तहमा हुने काम कारवाही सधैं विवादरहित र पारदर्शी बनाउनका लागि, सबैको भावनाको प्रतिनिधित्व र सम्बोधन हुने वातावरणको सृजना गर्न र संस्थालाई सशक्त, मजबूद एकताबद्ध तथा सबै अटाउने बृहत साझा संस्था बनाउनका लागि अमेरिकामा रहेका नेपाली समुदायमा क्रियाशील र स्थापित संघसंगठनहरूको गहन भुमिका रहन्छ ।”

साथै यही माघ २१ गते, बैतडी दोगडा केदार गाउँपालिकाकी १२ कक्षामा अध्ययनरत १७ बर्षीया भागरथी भट्टको बलात्कार गरि अमानवीय तवरले जघन्य हत्या गरेको घटना प्रति घोर निन्दा र भत्सर्ना गर्दै नेपाली जनसम्पर्क समिति अमेरिका यस्ता बर्बर र अपराधिक घटनामा संलग्न दोषीलाई अविलम्ब पक्राउ गरी कानुन बमोजिम हदैसम्मको कारवाही गर्न सरकारसँग महासचिव नेम्बाङले जोडदार माग गरेका छन् ।

यस दुखद घडीमा सिंगो समितिको तर्फबाट भागरथी भट्टको आत्माको चिरशान्तिको कामना गर्दै, शोकसन्तप्त परिवारजनमा हार्दिक समवेदना पनि प्रकट गरिएको छ ।