यातायात क्षेत्रलाई प्रविधिमैंत्री बनाउन आवश्यक : मन्त्री गुरुङ

२६ माघ, काठमााडौं । सञ्चार तथा सूचना प्रविधि मन्त्री पार्वत गुरुङले यातायात व्यवसायलाई प्रविधिमैंत्री बनाउने प्रतिवद्धता व्यक्त गरेका छन् । सोमबार सिंहदरवारस्थित आफ्नै कार्यकक्षमा नेपाल राष्ट्रिय मिटर ट्याक्सी व्यवसायी तथा चालक सेवा समाजका पदाधिकारीसँगको सामूहिक भेटमा मन्त्री गुरुङले यातायात क्षेत्रलाई प्रविधिमैंत्री बनाउन लागिपर्ने बताएका छन् ।

ग्राहकलाई ठगिन नदिन तथा सडक जाम लगायतका समस्या नहुने व्यवस्था मिलाउन पनि यातायात व्यवसायलाई प्रविधिसँग जोडेर अघि बढनुको विकल्प नरहेको उनले बताएका छन् । गुरुङले अन्तर्राष्ट्रिय मापदण्डको आधारमा सवारी साधनहरुको सञ्चालन र व्यवस्थापन गर्न सवारी चालकहरुलाई आग्रह समेत गरेका छन् । उनले सामाजिक सेवाको भावनाअनुसार बिरामीहरुलाई निःशुल्क सेवा दिन पनि सवारी चालकहरुको ध्यानाकर्षण गराएका छन् ।

मन्त्री गुरुङले भौतिक पूर्वाधार तथा यातायात मन्त्रालयमार्फत् यातायात ऐन प्रतिकूल हुने गरी सञ्चालनमा आएका सवारी साधनहरुको व्यवस्थापनमा लागिपर्ने बताएका छन् ।

समाजले सार्वजनिक सवारी साधनको भाडादरमा समायोजन गर्न, चालक तथा चालक मजदूरहरुलाई सामाजिक सुरक्षा कोषमा समावेश गर्नुपर्ने लगायतका १४ बुँदे मागसहितको ज्ञापनपत्र मन्त्री गुरुङलाई बुझाएको थियो ।