आक्रामक बन्दै वाणिज्य बैंकहरूः एक महिनामै एक खर्बले बढ्यो कर्जा प्रवाह

२७ माघ, काठमाडौ । यतिबेला बैंकहरु कर्जा प्रवाहमा आक्रमण देखिन थालेका छन् । पछिल्लो एक महिनामा वाणिज्य बैंकहरुले कर्जा प्रवाह १ खर्बले बढाएका छन् । लकडाउनका कारण ठप्प रहेको अर्थतन्त्र पुनः चलायमान हुन थालेको हो ।

पछिल्लो एक महिनाको तथ्यांक हेर्ने हो भने वाणिज्य बैंकहरुले १ खर्ब ३ अर्ब रुपैयाँ कर्जा प्रवाह गरेका छन् । गत पुष २४ गते बैंकहरुको कुल कर्जा प्रवाह ३१ खर्ब ८५ अर्ब रुपैयाँ रहेको थियो । यो माघ २३ गतेसम्म कर्जा प्रवाह बढेर ३२ खर्ब ८८ अर्ब रुपैयाँ पुगेको छ ।

नेपाल बैंकर्स एसोसिएसनका अनुसार पछिल्लो एक साताको अवधिमा बैंकले कर्जा प्रवाह २२ अर्ब रुपैयाँले बढाएका छन् । गत माघ १६ गते कुल कर्जा प्रवाह ३२ खर्ब ६८ अर्ब रुपैयाँ रहेकोमा माघ २३ गतेसम्म बढेर ३२ खर्ब ८८ अर्ब रुपैयाँ पुगेको छ ।

यसैबीच गत एक साताको अवधिमा वाणिज्य बैंकहरुको कुल निक्षेप संकलन पनि ५ अर्ब रुपैयाँले बढेको छ । योसँगै गत माघ २३ गतेसम्म वाणिज्य बैंकले ३७ खर्ब ८४ अर्ब रुपैयाँ कुल निक्षेप संकलन गरेका छन् । गत माघ १६ गते बैंकहरुको कुल निक्षेप ३७ खर्ब ७९ अर्ब रुपैयाँ रहेको थियो ।