अर्धवार्षिक समीक्षाः यो वर्ष १३ खर्ब ४४ अर्बमात्र बजेट खर्च हुने

२७ माघ, काठमाडौं । अर्थमन्त्रालयले चालु आर्थिक वर्षको बजेटको अर्धवार्षिक समिक्षा मार्फत आकार घटाएको छ ।

जेठ १५ मा ल्याएको बजेटमा यो वर्ष १४ खर्ब ७४ अर्ब खर्च हुने अनुमान थियो । मंगलबार अर्थमन्त्रालयमा पत्रकार सम्मेलन गर्दै अर्थमन्त्री बिष्णुप्रसाद पौडेलले यो वर्ष १३ खर्ब ४४ अर्ब खर्च हुने संसोधित अनुमान पेश गरे ।

अर्थ मन्त्रालयले यो वर्षमा बजेटको ९१.१९ प्रतिशत खर्च हुने प्रक्षेपण गरेको हो । त्यसमध्ये चालूतर्फ ९६.४० प्रतिशत, पुँजीगततर्फ ८०.२० प्रतिशत र वित्तीय व्यवस्थातर्फ ८५ प्रतिशत खर्च हुनेछ ।

सरकारले यो वर्ष प्रतिनिधिसभाको चुनाव घोषणा गरेको छ । त्यस्तै यही वर्ष कोरोना महामारीको खोप समेत ल्याउने जनाएको छ । ठूला खर्च हुने दुवै योजना बजेट बाहिरका हुन् । यी खर्च जोड्दा पनि खर्च निराशाजनक देखिएको हो ।