बलात्कार पछि हत्या गरिएकाको न्यायका लागि कांग्रेस वीपीले कार्यक्रम गर्ने

२७ माघ, काठमाडौं । नेपाली कांग्रेस ‘वीपी’ ले प्रधानमन्त्री निवास वालुवाटारमा बलात्कार तथा बलात्कार पछि हत्या गरिएकाको न्यायको निमित्त भन्दै कार्यक्रम गर्ने भएको छ । आज पार्टी कार्यालयका सचिव सुशीलराज वाग्लेले एक विज्ञप्ति जारी गर्दै माघ २९ गते बिहिबार दिउँसो साढे ३ बजे प्रधानमन्त्री निवास वालुवाटारमा बलात्कार तथा बलात्कार पछि हत्या गरिएकाको न्यायको निमित्त कार्यक्रम गर्न लागिएको जानकारी दिए ।

कांग्रेस ‘वीपी’ले सरकारले निर्मला पन्त, सम्झना बि क। जस्ता बलात्कार पछी हत्या गरिएका दोषीलाई कारबाही नगर्नु नै पछिल्लो समय दैनिक जसो बलात्कार तथा बलात्कार पछि हत्याको श्रृखला तीव्र गतिमा बढेको भन्दै सरकार नै बलात्कारका घटनामा प्रमुख दोषी रहेको आरोप लगाएको छ । कांग्रेस ‘वीपी’ ले गत २१ गते बुधबार बैतडी जिल्ला दोगडाकेदार गाउँपालिक -७ की भागीरथी भट्टको पनि विद्यालयबाट फर्कदै गर्दा बलात्कार पछी हत्या गरिएको पुष्टि हुदाँ समेत दोषी पत्ता लगाउन नसक्नु सरकार नागरिकप्रति गैर जिम्मेवार बनेको पुष्टि भएको बताएको छ ।

कार्यालय सचिव वाग्लेले जारी गरिएको विज्ञप्तिमा बलात्कार तथा बलात्कार पछि हत्या गरिएकाको न्यायको निमित्त हुने कार्यक्रमा सहभागी हुन पार्टीका नेताकार्यकर्ता, नागरिक समाज, मानवाधिकार, लेखक, पत्रकार, महिला अधिकारकर्मी, विद्यार्थी, कलाकार, सामाजिक संघ संस्था, राजनैतिक दल, नेपाली नागरिक सबैलाई अपिल गरेको छ ।

कांग्रेस ‘वीपी’ का महामन्त्री पुष्पराज पराजुलीले आज नै पार्टीको तर्फबाट एक विज्ञप्ति जारि गर्दै भागीरथी भट्टको बलात्कारपछि हत्या भएको आधिकारिक रुपमा पुष्टि भै सकेकोले यथाशीघ्र अनुसन्धान गरि दोषीलाई कारबाही गर्न सरकारसँग जोडदार माग गरेको छ । विज्ञप्तिमा भट्टको बलात्कारपछि विभत्स हत्या गरि फालिएको अवस्थामा शव भेटिएको घटनाको खबरले आफ्नो पार्टी मर्माहत भएको तथा बलात्कारपछि हत्या गरिएकी भागीरथी भट्टको आत्माको चिरशान्तिको कामना गर्दै परिवारजनमा हार्दिक समवेदना व्यक्त गरेको छ ।