नेपाल प्रहरीमा दुई दर्जन प्रहरी अधिकृतहरुको सरुवा (हेर्नुहोस् सुचीसहित)

२८ माघ, काठमाडौं । प्रहरी प्रधान कार्यालयले करिब दुई दर्जन प्रहरी अधिकृतहरुको सरुवा तथा पदस्थापन गरेको छ । माघ २७ गतेको निर्णय अनुसार सातजना प्रहरी उपरीक्षक ‘एसपी’ हरुको सरुवा भएको छ । त्यस्तै १६ जना प्रहरी उपरीक्षकहरुको पदस्थापन तथा ६ जना डीएसपीको सरुवा गरिएको छ ।

लामो समयदेखि विवादित रहेको जिल्ला प्रहरी कार्यालय चितवनमा ओमप्रसाद अधिकारीको सरुवा भएको छ । उनी जुनियर प्रहरी अधिकृत शिक्षालय भरतपुरमा कार्यरत थिए । चितवन जाने र लैजाने रस्साकस्सीको विवादका कारण लामो समय चितवनमा एसपीको सरुवा हुन सकिरहेको थिएन । नान्तीराज गुरुङको स्थानमा अधिकारी जाने भएका छन् । गुरुङ भने आर्कषक मानिने त्रिभुवन अन्तर्राष्ट्रिय विमानस्थलमा पुगेका छन् ।

यस्तै दीपशम्शेर जबरालाई नेपाल प्रहरीको १ नं. सशस्त्र प्रहरी गण,नक्साल, रेवती ढकाललाई काठमाडौं उपत्यका सशस्त्र प्रहरी गठन नं. २, भोलाबहादुर रावललाई काठमाडौं उपत्यका विशेष सुरक्षा प्रहरी गण, किसान सिंह थापालाई नेपाल प्रहरी पहरा गण र विकासराज खनाललाई काठमाडौं उपत्यका प्रहरी शिक्षालय सरुवा गरिएको छ ।

यस्तै हालै बढुवा भएका १६ जना एसपीको पदस्थापन गरिएको छ भने ६ जना डीएसपीको सरुवा गरिएको छ । अछामको प्रहरी प्रमुखमा डीएसपी तुलसीराम अर्याल र ताप्लेजुङमा बालनरसिंह राणालाई पठाइएको छ ।

यस्तै डीएसपी कोमल शाहलाई नगर प्रहरी कार्यालय, रामहरि पाण्डेलाई नेपाल प्रहरी सिंहदरबार सुरक्षा गण, नरहरि रेग्मीलाई प्रहरी वृत्त ठिमी र मनोहरप्रसाद भट्टलाई जिल्ला प्रहरी कार्यालय दार्चुला सरुवा गरिएको प्रहरी प्रधान कार्यालयले जनाएको छ ।