बृहत नागरिक आन्दोलनले शुक्रबार मार्चपास गर्ने

२८ माघ, काठमाडौं । देशमा भैइरहेका बलात्कारपछि हत्याका घटनाहरुबिरुद्ध बृहत नागरिक आन्दोलनले “सिंहदरबार महिला मार्चपास”को आयोजना गर्ने भएको छ ।

एक बिज्ञप्ति जारी गर्दै उसले शुक्रबार हुने मार्च पासमा सम्पूर्ण न्यायप्रेमी नागरिकहरुमा सहभगी हुन पनि आह्वान गरेको छ । बलात्कारसहित सबै प्रकारका महिला हिंसा, हत्या र दण्डहिनताको अन्त्य गर्न आफूहरु आन्दोलनरत रहेको बृहत नागरिक आन्दोलनले जनाएको छ ।

शुक्रबार हुने मार्चपासका लागि दिउँसो २ बजे बसन्तपुरमा भेला हुने र न्यूरोड, रत्नपार्क, भद्रकाली हुँदै सिंहदरबार मुलगेटसम्म मार्चपास हुने बिज्ञप्तिमा जनाइएको छ ।

मैना सुनुवार देखि निर्मला पन्तसम्म, अंगिरा पासी देखि भागरथि भट्टको बलात्कार पछि हत्या भएको जस्ता सिलसिलाहरु सँधैका लागि बन्द हुनुपर्ने र पीडितले न्याय पाउनुपर्ने बृहत नागरिक आन्दोलनले माग गरेको छ । पुरुष प्रधान कानुन र सत्ताको आडमा कुनै अपराधी र बलात्कारीले उन्मुक्ति पाउनु नहुने भन्दै घर, संविधान, संस्था र कानुनसमेत बदल्नुपर्ने आन्दोलनले माग गरेको छ ।