प्रधानमन्त्री आफै शक्ति प्रदर्शनमा निस्किएपछि देश त द्वन्दमा गैसक्यो : डा. कोइराला

३ फागुन, काठमाडौं । नेपाली कांग्रेसका प्रभावशाली नेता डा. शेखर कोइरालाले वर्तमान राजनीतिक घटनाक्रमहरुलाई बाध्यात्मक रुपमा भन्दा पनि नेपाली कांग्रेसले एक जिम्मेवारीका रुपमा लिएको बताएका छन् । नेता डा. कोइरालाले वर्तमान सरकरको पुष ५ गतेको कदम असंवैधानिक हो, अलोकतान्त्रिक हो, गैरराजनीतिक र बदनियतपूर्ण तरिकाले गरिएको बताएका हुन् ।

कान्तिपुर एफ.एम.को द हेडलाईनर्समा आज बिहान संक्षिप्त कुराकानी गर्दै नेपाली कांग्रेसका नेता डा. कोइरालाले भने–नेपाली कांग्रेसले त्यो गलत र अलोकतान्त्रिक कदमलाई सच्याउ भनेर सरकारलाई जिम्मेवारीपूर्वक भनिरहेको छ । यसैको बिरोधस्वरुप नेपाली कांग्रेसले वडादेखि गाँउ, नगर, क्षेत्र हुँदै आज देशका सतहत्तरै जिल्लामा बिरोध कार्यक्रम गर्न लागिरहेको बताए ।

नेता डा. शेखर कोइरालाले बीपीको भनाई स्मरण गर्दै भने–“नेपाली कांग्रेस आफ्नै खुट्टामा उभिएर अगाडि बढनु पर्छ, नेपाली कांग्रेसको आफ्नै पहिचान छ, हाम्रो छुट्टै विचार पनि छ ।”नेता डा. कोइरालाले अगाडि भने छ अहिले हाम्रो (सबै राजीतिक दलको) मुद्धा एउटै होला, मुलुकको राजनीतिक संकटको मुद्धामा पहिला हामी आफैले प्रयाश गर्दै जानु पर्छ, भन्दै हामीले अहिले प्रतिपक्षीहरुलाई हैन बीपीलाई सम्झनु पर्छ, बीपीले भनेका कुराहरुलाई सम्झनु पर्छ ।

केही समय अघि नेपाली कांग्रेसका सभापति शेरबहादुर देउवाले भनेको“सडकमा उफ्रिदैंमा संसद पुर्नस्थापना हुँदैन”भन्ने प्रश्नको जवाफमा नेता डा.कोइरालाले भने–पार्टी सभापतिले भनेको कुरा ठ्याक्कै भन्न सक्दिन, मिडियामा आएका कुराहरुलाई मात्रै हेरे र सुनेर म केही भन्न सक्दिन । म सर्बोच्च अदालतलाई दवाव दिन पनि चाहान्न, आग्रह गर्न पनि चाहान्न ।

नेता कोइालाले पुरानो कुरा स्मरण गराउँदै भने जुनबेला सभापतिजीले आफु प्रधानमन्त्री हुँदा निर्वाचन गराउन सक्नु भएन र राजाले बिघटन गरे र उनलाई हटाउनु भो, त्यो बेला गिरिजाप्रसाद कोईराला बिपक्षी दलको नेताको हैसियतले सुप्रिम कोर्टमा मुद्धा दर्ता गर्नु भो र सर्बोच्च अदालतले पनि तत्कालिन प्रधानमन्त्री तथा वर्तमान पार्टी सभापतिजीले गर्नुभएको संसद बिघटनलाई सदर गर्यो तर त्यसको चार बर्षपछि संसद के को बलमा भयो ? भनि प्रतिप्रश्न गर्दै डा. कोइरालाले भने– के त्यो कुरा सभापतिजीले बुझ्नु भएको छैन ? के जनतालाई थाहा छैन र जनताको आन्दोलनको बलमा संसद पुर्नस्थापना भएको भन्ने कुरा ?

डा. कोइरालाले अगाडि भने, (सभापतिले) अहिल्यै यो कुरा भन्नु हुदैनथ्यो भन्दै केही बर्ष अघि मात्रै भएको जनआन्दोलनको स्मरण गराउँदै त्यो बेला नेपाली कांग्रेस प्रजातान्त्रिक, नेकपा एमाले र नेपाल सदभावना पार्टीहरुलाई पनि संसद पुर्नस्थापना हुन्छ भन्ने विश्वास थिएन तर गिरिजा प्रसाद कोईरालाको एक्लो प्रस्ताव संसद पुर्नस्थापना हुनुपर्छ भन्ने अडानमा हुनुहुन्थ्यो  । पछि सबै दलहरु गिरिजाबाबुकै अडानमा एकाकार हुन आएकोले आन्दोलन सफल भएको र संसद पुर्नस्थापना भएको कुरालाई समेत अन्तरवार्ताका क्रममा जोडेका थिए ।

नेपाली कांग्रेसको आगामी रणनीतिका बारेमा सोधिएको प्रश्नमा डा.कोइरालाले नेपाली कांग्रेसको आगामी रणनीति फागुन ५ गते बस्ने केन्द्रीय समितिले तय गर्ने पनि बताउनु भएको छ । यो सरकारले गरेका असंबैधानिक कदमको बिरोधमा सबै राजनीतिक दलहरु सडकमै रहेको अवस्थामा प्रधानमन्त्रीजीले संबिधानको धारा नै उल्लेख नगरी गरिएको संसद बिघटनको बिषयमा अदालत आफैले हेर्न सक्ने, बुभ्न सक्ने र सहि निर्णय गर्न सक्नेमा आफु विश्वस्त रहेको बताए ।

वर्तमान प्रधानमन्त्रीतर्फ ईंगित गर्दै नेता कोइरालाले भने म जे गर्छु, जे बोल्छु त्यहि कानून हो भन्नुहोला तर संबिधानका धाराहरुलाई पनि त हेर्नु पर्ला नि ? भन्दै नेता डा.कोइरालाले भने, प्रधानमन्त्री के निर्णय गर्नु हुन्छ त्यो उनको बिचार हो तर देशमा रहेका सम्पूर्ण क्रियाशिल पार्टीहरुले यो असंबैधानिक कदम हो, यसलाई सच्याउ भनि सकेपछि, संसद पुर्नस्थापना बाहेकको अर्को बिकल्प नै नरहेको जिकिर गरे ।

सर्बोच्च अदालते संसद पुर्नस्थापना गर्छ भन्ने कुरामा विश्वस्त हुँदै डा. शेखर कोइरालाले अगाडि भने,–तर संसद पुर्नस्थापना नभए के हुन्छ ? भन्ने तपाईको काल्पनिक प्रश्नको उत्तर त्यसपछिको स्थिति भयाभह स्थितिमा जान्छ, नेपाल द्वन्दमा फँस्न सक्छ । देशको प्रधानमन्त्री नै आफै बिरोसभा गर्दै हिडिरहेको प्रति लक्षित गर्दै डा. कोइरालाले भने मलाई प्रधानमन्त्रीको यो कदम प्रति हाँसो लागेको छ । त्यो गर्नुपर्ने आवश्यक नै छैन । त्यो त कमजोर ब्यक्तिहरुले गर्ने काम हो । प्रधानमन्त्री त आफै शक्तिशाली हो नि । प्रधानमन्त्री आफै शक्ति प्रदर्शनमा निस्किए पछि देश त द्वन्दमा गैसक्यो नि भन्दै कोइराला भन्छन्,–अहिले मुलुकमा एउटै मात्र लोकतान्त्रिक पार्टी नेपाली कांग्रेस मात्रै रहेकोले पार्टीले धेरै गर्न सक्नु पथ्र्यो तर गर्न नसकिएको समेत स्विकार गरे ।

संबैधानिक परिषदमा हामी चुक्यौं भन्दै यस्ता कार्यले नेपाली कांग्रेसका सभापति पनि जनताको नजरमा शंकाको घेरामा छन् । पत्रकारको प्रश्नको उत्तर दिदैं नेता डा. कोइरालाले भने,– सच्याउने भनेकै खारेज गर्ने हो भन्दै संबिधान निर्माणको अवस्थाको स्मरण गर्दै संबैधानिक परिषदको नियुक्तिका बारेमा समेत असन्तुष्टि ब्यक्त गरे । खल्तीबाट मान्छेहरु निकाल्दै नियुक्ति गर्न थालेपछि संबैधानिक परिषदको औचित्य नै के हुन्छ ? उनले आक्रोश ब्यक्त गरे ।

संबैधानिक निकायहरुलाई हामीले बलियो बनाउन सकेनौं भने लोकतन्त्र कमजोर हुन्छ भन्दै कांग्रेस नेता कोइरालाले सरकारका संबैधानिक निकायहरुलाई पूर्ण लोकतान्त्रिक बनाउन सक्नुपर्ने कुरामा जोड दिए । निर्वाचनका बिषयमा सोधिएको प्रश्नमा नेता कोइरालाले भने–निर्वाचन गराउन चुनाव चिन्ह कै लडाई अहिलेसम्म सकिएको छैन, दोश्रो कुरा निर्वाचन स्वतन्त्र, निश्पक्ष धाँधलीरहित हुनुपर्यो र त्यो देखिनु पनि पर्यो, अन्तराष्ट्रिय निकायले यसलाई नजिकैबाट नियाली रहेको हुन्छ, भएन भने त्यो बदर भनेर भन्छ त्यो बदरै हुन्छ । निर्वाचन भनेको एक्लैले गर्ने कुरा होईन । त्यसमा राजनीतिक दलहरुको सहभागिता पनि हुनुपर्यो । कल्पना गर्नुस् प्रचण्ड–माधव नेपाल समूहले निर्वाचनमा भाग लिनु भएन भने के अवस्था आउला ।