विपत्तिलाई मध्यनजर राख्दै रसुवामा पूर्व तयारीका सामग्री सङ्कलन

४ फागुन,रसुवा । विभिन्न पर्नसक्ने विपत्तिलाई मध्यनजर राख्दै पूर्व तयारीका सामग्री सङ्कलनमा पहिलो प्राथमिकता दिइने भएको छ । वर्षायाममा बाढीपहिरोबाट प्रभावित हुने र हिउँद याममा लाग्ने वन जङ्गलका डडेलो नियन्त्रणमा मद्दत पु¥याउने खालका यथेष्ठ सामग्री भण्डारण गर्नुपर्ने आवश्यकता औँल्याइएको हो ।

सुरक्षा निकाय, सरोकारवाला र गैरसरकारी संस्थाबीच सोमबार जिल्ला प्रशासन कार्यालय रसुवामा आयोजित पर्नसक्ने विपद् र समाधानका विषयक कार्यक्रमले विपद्को अवस्थामा खोज, उद्वार एवं तत्कालको राहत र वन जङ्गलको डडेलो नियन्त्रणका सामग्री भण्डार व्यवस्थामा पहिलो प्राथमिकता दिने तय भएको हो ।

सरकारी निकायको साथै जिल्लास्थित नेपाल रेडक्रस, अपाङ्गता पुनःस्थापना केन्द्र र ट्रान्सफरेन्सी इन्टरनेशनल निकायसमेतका प्रतिनिधिको उपस्थितिमा भएको समीक्षा कार्यक्रमले रसुवामा बढी भिरपाखो भएका कारण डडेलो नियन्त्रणमा भने सफलता हासिल गर्न नसकेको सहभागीले बताए । गत महिना हाकु क्षेत्रको जङ्गलमा लागेको डडेलो तीन दिनको प्रयासमा अग्नि रेखा बनाएर नियन्त्रणमा ल्याइएको प्रमुख जिल्ला अधिकारी हरिप्रसाद पन्तले बताएका थिए । भौगोलिक विकटता, बढी भीरपाखो, अधिकांश समय चलिरहने हावाहुरी जस्ता कारण रसुवाको जङ्गलमा अचानक लाग्ने डढेलो नियन्त्रणमा कठिनाइ हुने गरेको वन प्राविधिकले बताएका छन् ।

रसुवाको जङ्गल समय–समयमा धेरै डडेलोको चपेटामा पर्ने र डडेलो किन लगाइन्छ दोषी को हो भन्ने विषयमा खोजी गर्ने निकायले बेवास्ता गर्दा वर्षेनी जङ्गलका स–साना वनस्पति नोक्सान हुँदै गएको स्थानीय बासिन्दाले बताएका छन् ।

जिल्ला विपद् व्यवस्थापन समितिमा खोज उद्वारका केही सामग्री मौज्दात रहेको जनाउँदै प्रजिअ पन्तले अपुग सामग्री जुटाउने प्रयासमा आफू अगाडि बढिरहेको बताएका थिए । यस चालू आर्थिक वर्षमा दुई वटा घरमा आगलागी हुनुको साथै वन कार्यालयको हाकु, लाङ्टाङ राष्ट्रिय निकुञ्ज क्षेत्रको ग्राङ एवं यार्सा क्षेत्रको जङ्गलमा डडेलो लागेको बताइन्छ ।