सरकारले भारतमा उत्पादित कोभिसिल्ड खोप खरिद गर्ने

५ फागुन,काठमाडौं । सरकारले अग्रिम भुक्तानी गरेर भारतमा उत्पादित कोरोना भाइरसविरुद्धको ‘कोभिसिल्ड’ खोप खरिद गर्ने निर्णय गरेको छ । मंगलबार साँझ बसेको मन्त्रिपरिषदको बैठकले भारतको कोरोना भाइरसविरुद्धको खोप उत्पादक कम्पनीको सर्तअनुसार नै अग्रिम भुक्तानी गरेर खोप खरिद गर्ने निर्णय गरेको हो ।

अक्सफोर्ड–एस्ट्राजेनेकाको कोरोनाविरुद्धको खोप उत्पादन गरिरहेको भारतको सेरम इन्स्टिच्युटसँग सरकारले प्रतिखोप ४ डलरका दरले २० लाख डोज खोप किन्ने सरकारले तयारी गरेको थियो । तर, सेरमले खोपको रकम अग्रमि भुक्तानी गर्नुपर्ने सर्त राखेपछि स्वास्थ्य तथा जनसंख्या मन्त्रालयले बाधा अड्काउ फुकाउन मन्त्रिपरिषदमा प्रस्ताव गरेको थियो ।

खरिद ऐन र नियमावलीअनुसार खरिद गर्न लागेको सामानको ८० प्रतिशत मात्रै अग्रिम भुक्तानी दिन सक्ने मात्रै प्रावधान छ । जसले गर्दा खोप खरिदमा कानुनी जटिलता देखिएको थियो ।

मन्त्रालयको उक्त प्रस्तावलाई पास गर्दै मन्त्रिपरिषदले खोप खरिदका लागि अग्रिम रकम भुक्तानीको बाटो खुला गरेको एक मन्त्रीले जानकारी दिए । उनका अनुसार अहिले सहुलियत दरमा कोभिसिल्डको खोप ल्याउन लागेको हो । ‘केही बाधा अड्काउ फुकाउने काम क्याबिनेटले गरेपछि ४ डलरका दरमा २० लाख डोज खोप ल्याउने निर्णय भएको छ,’ ती मन्त्रीले भने ।