एआईजी पोखरेलकाे गुटिया सेटिङ, ठेक्कापट्टामा हस्तक्षेप !

५ फागुन, काठमाडौं । भावी आईजीपीका रुपमा चिनिएका नेपाल प्रहरीका एआईजी विश्वराज पोखरेल यतिबेला अपराध अनुसन्धान विभागको प्रमुख रहेका छन् । प्रहरीको महत्वपूर्ण विभागको रुपमा रहेको अपराध अनुसन्धान विभागलाई हाँक्ने जिम्मेवारी पाएका एआईजी पोखरेलले हेर्ने विभाग आईजीपीपछिको विभाग हो ।

इन्टरपोल, मानव वेचविखन, लागुऔषध, साइवर व्यूरो तथा महिला बालबालिका व्यूरो जस्ता निकायहरु सो विभाग अन्तरगत रहेका छन् । महानगरीय अपराध अनुसन्धान महाशाखामा पनि सो विभागको हलुका छायाँ पर्ने गरेको छ । अबको एक वर्षपछि आईजीपी हुने लाइनमा रहेका एआईजी पोखरेलले आफू मातहतका निकायलाई आईजीपीको भन्दा बढी हस्तक्षेप गर्न थालेकाे गुनासाे बढ्न थालेकाे छ ।

खासगरी अहिले निर्वाचन हेर्ने गरी मुख्यालयले उनलाई जिम्मा दिएकाले पनि एआईजी पोखरेलको हस्तक्षेपकारी भूमिका बढ्दै गएको हो । निर्वाचनका लागि बजेटसमेत ठूलो अंकमा निकासा गर्न सकिने र त्यसको बाँडफाँट आफ्नो तजबिजमा गर्न सकिने भएकाले उनले रोजेरै त्यो जिम्मा लिएपछि उनले आफ्नो चुरीफूरी बढाएको प्रहरी प्रधान कार्यालय स्रोतले जनाएको छ ।

प्रहरी प्रधान कार्यालय स्रोतका अनुसार प्रहरी अधिकृतहरुको सरुवामा समेत उनले आफै हात हाल्न थालेका छन् ‘ एआईजी पोखरेल यति धेरै हाबी छन् कि सानो–सानो सरुवा बढुवा पनि आईजी थापाले गर्न सक्दैनन्’, स्रोतले भन्यो । अबको एक वर्षपछि आफूले नै चलाउने हो भन्दै आईजीपी थापालाई भूमिकाविहीन पारेर अहिलेदेखि नै एआईजी पोखरेलले आफ्नो गुटिया सेटिङ थालेको स्रोतको दावी छ । पछिल्लो समय आफैं छायाँ आईजीपी हो भन्दै उनले प्रहरीको ठेक्कापट्टामा समेत हस्तक्षेप गर्न थालेकाे बताइएकाे छ ।

पछिल्लो समय निर्माण हेर्ने प्राविधिक निर्देशनालयमा हुने कमिशनको चलखेलका कारण भवनहरू भत्कने, बिग्रनेजस्ता समस्या आउने गरेका छन् । नेपाल सरकारले दिएको बजेटबाट नेपाल प्रहरीका धेरै भवन निर्माण भइरहेका छन् । प्रहरीका भवन निर्माणका लागि करिब १ अर्ब रुपैयाँ बजेट निर्माणमा छुट्याइएको छ ।

बजेटको ठूलो हिस्सा लुम्बिनी प्रदेशमा परेको छ । त्यहाँको बजेट परिचालनको जिम्मा इन्जिनियर सुमन दाहालले पाएका छन् । उनी प्रहरी निरीक्षक हुन् । तर, विश्वराज पोखरेलले नै त्यहाँ पनि हस्तक्षेप गरी काम जस्तोसुकै होस्, माथिसमेत बुझाउनुपर्ने हुनाले कमिशन राम्रै मिलाउनुपर्छ भन्दै अनियमितता गरेको बताइएको छ ।

एआईजी पोखरेलले जहाँ सबैभन्दा बढी प्रहरीका भवन निर्माणमा अनियमितताका कुरा सार्वजनिक भएका छन्, त्यहाँ उनकै हस्तक्षेप चल्ने गरेको प्रहरी स्रोतले दावी गरेकाे छ । एआईजी पोखरेलकै योजनामा सिनियर एसपीहरूले भनेजति कमिशन नदिएपछि जुनियर ओभरसियरहरूलाई प्रदेशमा निर्माण हेर्न खटाउने गरिएको दावी स्रोतकाे छ ।

निर्माण, खरिदको र ठेक्काको काम प्रबन्ध शाखाको हुने भएपनि पोखरेलले डीआईजी पुरुषोत्तम कंडेल र एसपी प्रेम बस्न्यातलाई हातमा लिएर उनी आफै सेटिङ थालेका हुन् । तर उनको हस्तक्षेपको विषयमा डीआईजी कंडेलले आईजीपी शैलेश थापालाई उजुरी गर्ने गरेकाे बताइएकाे छ।