स्थानीय उत्पादनलाई बजारीकरण गर्दै सहकारी

५ फागुन,दुल्लू । चामुण्डा विन्द्रासैनी नगरपालिका–२ मा रहेको सिर्जन चामुण्डामाई बहुउद्देश्यीय सहकारी संस्थाले स्थानीय उत्पादनलाई बजारीकरण गर्न थालेको छ । सहकारी संस्थाले २०७७ साउनदेखि कृषकले उत्पादन गरेको दूधलाई बजारीकरण शुरु गर्न थालेको हो ।

बहुउद्देश्यीय सहकारी संस्थाका सदस्यले उत्पादन गरेका फलफूल, तरकारी, भटसमासलगायत जैविक वस्तुलाई बजारीकरण गरी स्थानीयस्तरका कृषकको आम्दानी बढाउन थालेको सहकारी संस्थाका अध्यक्ष भीमबहादुर रावतले बताएका छन् । सहकारीमा ५० जना कृषकले दूध बिक्री गर्ने गर्दछन् । सहकारीले दूध मात्रै नभई स्थानीयस्तरमा उत्पादन गरेका नगदेबाली, फलफूललगायतका कृषिजन्य वस्तुको बजारको बजारीकरण गरेको स्थानीयवासी बताउँछन् ।

सहकारीले बोइलर दाना उद्योग, मसला उद्योग र अल्लो प्रशोधन उद्योग सञ्चालनमा ल्याउने तयारीसमेत थालेको छ । सहरकारीले नै स्थानीय उत्पादनको बजारीकरण गर्न थालेपछि कृषकले आफू उत्पादित वस्तु बिक्री हुँदैनन् कि भन्ने चिन्ता हटेको चामुण्डाविन्द्रासैनी नगरपालिकाका प्रमुख सूर्यबहादुर शाहीले बताएका छन् ।

सहकारी नाफामुखी नभई सेवामूलक भएकाले किसानलाई बचत तथा ऋणमा मात्रै नभई आयआर्जन क्रियाकलापमा पनि सरिक गराइएको छ । किसानलाई अनुदान, प्रोत्साहन र तालीमजस्ता क्रियाकलापमा पनि संलग्न गराइने बताउँदै स्थानीय, प्रदेश र सङ्घ सरकारले सडक, कृषबस्तु सङ्कलन केन्द्र स्थापनाका लागि स्थानीय सरकार लागिपरेको प्रमुख शाहीको भनाइ छ । सहकारीले सरकार, बजार र किसानबीच पुलको काम गरी नागरिकलाई आयआर्जन र व्यवसायमा सहज ल्याउन भूमिका खेल्ने संस्थाका सचिव रवीन्द्र कँडेलले बताएका छन् ।

त्यस्तै सहकारीले कर्णाली प्रदेशको भूमि व्यवस्था कृषि तथा सहकारी मन्त्रालयअन्तर्गत पशु सेवा कार्यालयबाट रु एक करोड, चामुण्डाबिन्द्रासैनी नगरपालिकाको रु ३० लाख र सहकारीको रु ३० लाख गरी रु एक करोड ६० लाखमा एक सय जना कृषकलाई भैँसी वितरण गरेको छ ।