विभिन्न जिल्लामा आगलागी हुँदा धनमाल जलेर नष्ट

६ फागुन, काठमाडौं । लमजुङ, पर्सा र ताप्लेजुङमा आगलागी हुादा विभिन्न धनमाल जलेर नष्ट भएको प्रहरीले जनाएको छ । लमजुङ, दोर्दी गाउँपालिका-८ खिम चोक बस्ने ५६ वर्षीय रन बहादुर तामाङको घरमा भान्छाबाट बुधबार दिउँसो आगलागी हुँदा घर जलेर करिब ११ लाख ५० हजार रुपैयाँ बराबरको धनमाल नष्ट भएको हो । स्थानीयबासीको सहयोगमा आगो नियन्त्रणमा आएको छ ।

यस्तै, पर्साको वीरगंज महानगरपालिका-२ ईदगाहा चोक बस्ने भारत घर भएका कमरुल हसनको कवाडी गोदाममा बुधबार साँझ आगलागी हुँदा गोदाममा रहेको कवाडी जलेर करिब २ लाख ५० हजार रुपैयाँ बराबरको धनमाल नष्ट भएको छ । दमकल र स्थानीयबासीको सहयोगमा आगो नियन्त्रणमा आएको छ ।

उता ताप्लेजुङको पाथिभरा याङवरका गाउँपालिका-१ स्थित त्रिवेणी सामुदायिक वनमा बुधबार बेलुका आगलागी भएको छ । आगलागी भएको भन्ने जानकारी प्राप्त हुनासाथ जिल्ला प्रहरी कार्यालय ताप्लेजुङ र प्रहरी चौकी मेवाखाबाट खटिएको प्रहरीद्वारा दमकल र स्थानीयवासीको सहयोगमा आगो निभाउने कार्य भइरहेको छ । यस सम्बन्धमा स्थानीय प्रहरीले आवश्यक अनुसन्धान गरिरहेको छ ।