खोपको देशव्यापी कार्यतालिका सार्वजनिक गर्न कांग्रेसको माग

६ फागुन, काठमाडौं । नेपाली कांग्रेसले कोभिड–१९ विरुद्धको खोपको प्रभावकारिता सुनिश्चित गर्ने सबै उपायका साथै खोप कार्यक्रमको देशव्यापी कार्यतालिका सार्वजनिक गर्न माग गरेको छ । कांग्रेसले खोप प्राप्त गर्ने जनसंख्याको प्राथमिकताक्रमको विस्तृत विवरण सार्वजनिक गर्न माग गरेको हो ।

कांग्रेस सह–महामन्त्री तथा कोभिड– १९ अनुगमन समितिका संयोजक डा.प्रकाशसरण महतले बिहीबार पार्टी कार्यालयमा पत्रकार सम्मेलन गर्दै कोभिड–१९ विरुद्धको खोपको कार्यतालिका र सबै नागरिकले खोप पाउने कार्यको सुनिश्चितता गर्न माग गरे ।

कांग्रेसले कोभिडको नयाँ भेरिएन्ट नेपालमा प्रवेश हुन नदिन आवश्यक पर्ने सम्पूर्ण उपाय अपनाउनसमेत सरकारसँग माग गरेको छ । सरकारको चरम उदासिनता र लापरवाहीका बाबजुद कोभिड–१९ को प्रभाव समाजमा कम हुँदै गएको देखिएपनि अझै यसको प्रकोप समाप्त भएको छैन ।

उनले कोभिड–१९ विरुद्ध आमजनतालाई खोप लगाइ स्थायी रुपमा यो प्रकोपलाई रोक्न सरकारले कुनै स्पष्ट कार्ययोजना नल्याएको आरोप लगाए । कांग्रेसले भविष्यमा पनि अन्य देश र संस्थाहरूबाट आउन सक्ने अनुदान खोप सहयोग र आवश्यकता अनुरुप खरिद गरी खोप ल्याउन डब्लुएचओको मापदण्ड पूरा गरेका खोपहरूलाई मात्र प्रयोग गर्न अनुमति दिन सरकारसँग माग गरेको छ ।