राससको ६० औँ वार्षिकोत्सवमा राससकर्मी पुरस्कृत

७ फागुन, काठमाडौं । राष्ट्रिय समाचार समिति राससको ६० औँ वार्षिकोत्सव तथा हीरक वर्ष प्रवेशका अवसरमा वर्षभर उत्कृष्ट काम गर्ने पत्रकार तथा कर्मचारी पुरस्कृत भएका छन् । रासस केन्द्रीय कार्यालयमा आज आयोजित समारोहमा सञ्चार तथा सूचना प्रविधिमन्त्री पार्वत गुरुङ र सञ्चार मन्त्रालयका सचिव हरिप्रसाद बस्यालले ती पुरस्कार प्रदान गरे ।

नेपाल पत्रकार महासंघ, रासस शाखाद्वारा स्थापित ‘रासस पत्रकारिता पुरस्कार’ वरिष्ठ सम्पादक श्रीमती मोहिनी मिश्र रिसाल ‘केन्द्रीय कार्यालय’ र उपसमाचारदाता वीरेन्द्रनारायण कर्ण ‘रासस वीरगञ्ज कार्यालय प्रमुख’ले प्राप्त गरे । पुरस्कारको राशि जनही रु १० हजार छ । त्यसैगरी महासंघले मनीन्द्रलाल श्रेष्ठ ‘राससका पूर्व कर्मचारी’ र श्री शरच्चन्द्र भण्डारी ‘उपप्रमुख समाचारदाता, रासस केन्द्रीय कार्यालय’ लाई विशेष सम्मान गरेको छ ।

यस वर्षको ‘उमाकान्त–गीतादेवी–चन्द्रमणि स्मृति पत्रकारिता पुरस्कार’ स्थानीय समाचारदाता ‘स्ट्रिङ्गर’ रवीन्द्र काफ्ले ‘पाँचथर’ लाई प्रदान गरिएको छ । पुरस्कारको राशि रु ७ हजार ५०० छ । सो पुरस्कार रासस कार्यालय तुल्सीपुर, दाङका प्रमुख नारायणी रजौरेले आफ्ना मातापिता र भाइका स्मृतिमा स्थापना गरे ।

रासस कर्मचारी संघले स्थापना गरेको ‘वासु रिमाल यात्री स्मृति पुरस्कार’ वरिष्ठ समाचारदाता प्रभाषचन्द्र झा ‘रासस प्रदेश नं २ कार्यालय, जनकपुर’ र कार्यालय सहयोगी खिलप्रसाद दाहाल ‘रासस केन्द्रीय कार्यालय’ लाई प्रदान गरिएको छ । पुरस्कारको राशि जनही रु पाँच हजार छ । त्यसैगरी नेपाल राष्ट्रिय कर्मचारी सङ्गठन, रासस शाखाद्वारा स्थापित ‘आदित्यध्वज जोशी स्मृति पुरस्कार’ दीपराज सन्याल ‘अङ्ग्रेजी समाचार प्रमुख’ र राजेशकुमार श्रेष्ठ ‘उपव्यवस्थापक, लेखा शाखा’ लाई प्रदान गरिएको छ । पुरस्कारको राशि जनही रु पाँच हजार ५५५ छ ।