कांग्रेस प्रदेश सरकार विरुद्ध उभिने : वरिष्ठ नेता पौडेल

७ फागुन, विराटनगर । राजनीतिक रुपमा विभाजित नेकपा कानूनी रुपमा एउटै रहेको निर्वाचन आयोगको ठहर छ । जसले गर्दा बहुमतको शक्ति भएपनि प्रचण्ड – माधव समूह निरीह देखिएका छन् । कानूनी रुपमा विभाजित नभएको भन्दै प्रमुख प्रतिपक्षी दल नेपाली कांग्रेससमेत यो समूहसँग मिलेर आन्दोलन गर्न मानिरहेको छैन ।

यही कारणले गर्दा प्रदेश सरकारविरुद्ध आएका अविश्वास प्रस्ताव अलपत्र परेको छ । गत पुष १२ गते प्रचण्ड–माधव पक्षले प्रदेश नं. १ र बाग्मती प्रदेश सरकारविरुद्ध अविश्वास प्रस्ताव पेश गरेको छ । दुई महिना समय व्यतित भइसक्दासमेत यो प्रकरणले कुनै निकास पाएको छैन । त्यसको प्रमुख कारण मध्ये एउटा हाे , प्रमुख प्रतिपक्षी दल नेपाली कांग्रेस भित्रको बेमेल ।

कांग्रेस संस्थापन पक्षले प्रधानमन्त्री ओली पक्षलाई सघाउने नीति बनाएको छ, जबकी इतर पक्षले प्रतिपक्षीय भूमिका निर्वाह गर्न कांग्रेस चुक्नु हुँदैन भन्ने अडान राखेको छ । कांग्रेस भित्रको यही द्विविधाको फाइदा ओली पक्षले उठाएको पाइन्छ । तर अब भने यस्तो अलमलको अवस्था नरहने भन्दै वरिष्ठ नेता रामचन्द्र पौडेलले पार्टी सभापतिले मात्रै चाहेर प्रदेश सरकार नजोगिने धारणा व्यक्त गरेका छन् ।

पार्टी संगठन विस्तारका लागि आजबाट साताव्यापी पूर्व क्षेत्रको भ्रमणमा निस्किएका पौडेलले विराटनगर विमानस्थलमा सञ्चारकर्मीहरुसँग भने– अब ओलीको प्रदेश सभा देउवाजीले थेग्न सक्नुहुन्न । सभापतिजीले चाहेकै भरमा प्रदेश सरकार जोगिने अवस्था छैन भन्दै वरिष्ठ नेता पौडेलले नेपाली कांग्रेसले प्रतिपक्षीय धर्म निर्वाह गर्ने प्रष्ट पारे ।

सरकारविरुद्ध आउने प्रस्ताव पारित गर्नु प्रतिपक्षको धर्म र कर्तव्य पनि हो, त्यसैले अब कसैले चाहँदैमा प्रदेश सरकार जोगिने अवस्था छैन – उनले भने ।