नेकपाका दुबै पक्ष कांग्रेसको भरमा

१२ फागुन, काठमाडौं । प्रतिनिधिसभा पुनस्थापना गर्न सर्वाेच्च अदालतले फैसला गरेपछिको राजनीतिक घटनाक्रम नाटकीय रुपमा अघि बढिरहेको छ । नेकपाका दुबै गुट जसरी भएपनि एक अर्कालाई परास्त गर्न अझै कम्मर कसेर लागिपरेका छन् ।

हिजो साँझ सर्वाेच्चले पुनस्थापनाको फैसला गरेयता प्रधानमन्त्री केपी ओली तनावमा छन् भने उनका प्रतिस्पर्धीहरु पुष्पकमल दाहाल ‘प्रचण्ड’ र माधवकुमार नेपाल भने उत्सव मनाइरहेका छन् । तर अब अर्काे चिन्ता थपिएको छ – कसरी राजनीतिक परिदृश्यमाथि नियन्त्रण गर्ने ?

ओली चाहन्छन्–प्रचण्ड वा माधव नेपाल कुनै हालतमा पनि सत्तामा जान नपाउन् । मिलेसम्म आफैं सत्तामा टिक्न नेपाली कांग्रेस गुहार्ने नत्र कांग्रेस सभापति शेरबहादुर देउवालाई सरकार बनाउन निम्तो दिने । स्रोतका अनुसार, यस विषयमा आज बिहानै ओली र देउवाबीच टेलिफोनमा छलफल भएको छ । ओलीले देउवालाई प्रधानमन्त्री बन्न सघाउने तर ६ महिना भित्रै चुनावमा जाने गरी सहमति जुटाउनुपर्ने सर्त राखेका छन् ।

ओलीले यस्तो अफर गरेको सुइँको प्रचण्ड – माधवले पनि पाए । चितवनमा रहेका नेताद्वय आज बिहानै काठमाडौं आउने तयारीमा थिए । तर जहाजको उडान ढिला भएकाले ११ बजे मात्रै राजधानी आएका छन् । उनीहरुले देउवालाई भने हिजैदेखि फोनबाट छलफल गर्न चाहेको बताइरहेका थिए । राजधानी आए लगत्तै प्रचण्ड–माधव एयरपोर्टबाट सोझै देउवा निवास बुढानिलकण्ठ पुगे । जबकी पूर्व निर्धारित कार्यक्रम अनुसार, मध्यान्ह १२ बजे विजय उत्सव मनाउने कार्यक्रम तय भएको थियो ।

देउवासँगको भेटमा सत्ता साझेदारीका विषयमा छलफल भएको बुझिएको छ । देउवाले आफूसँग ओलीले पनि यस्तै प्रस्ताव राखेको जानकारी दिंदै सोही बमोजिम ओलीले स्थायी कमिटी बैठक राखेको बताए । त्यसपछि प्रचण्ड–माधवले पनि आफूहरुले समेत स्थायी कमिटीबाटै निर्णय गर्ने वचन दिएका छन् । सोही बमोजिम नेताद्वयले त्यहींबाट आजै दिउँसो २ बजेका लागि स्थायी कमिटी बैठक डाकेका छन् ।

स्थायी कमिटीबाटै सत्ता साझेदारीका विषयमा निर्णय गर्ने र प्रधानमन्त्रीमा नेपाली कांग्रेसलाई प्रस्ताव गर्ने बुझिएको छ । उता, ओली पक्षको पार्टी स्थायी कमिटीले समेत यस्तै प्रस्ताव गर्ने बुझिएको छ । नेकपाका दुबै पक्षले गर्ने निर्णयका आधारमा नेपाली कांग्रेसले पनि केन्द्रीय कार्यसमिति बैठक बोलाउने तयारी गरेको स्रोतको भनाई छ । सम्भवतः भोलि नै कांग्रेसले पनि कार्यसमिति बैठक बोलाउने छ ।