आज साँझ ५ बजे क्याबिनेट बस्दै

१४ फागुन, काठमाडौं ।  सर्वाेच्च अदालतको आदेश कार्यान्वयन गर्न सरकारले प्रतिनिधिसभा बैठक आह्वान गर्न लागेको छ । यस प्रयोजनका लागि आज साँझ ५ बजेका लागि मन्त्रिपरिषद बैठक बोलाइएको छ । बालुवाटार निकट स्रोतका अनुसार, प्रधानमन्त्री केपी ओलीले यसबारे हिजो साँझ राष्ट्रपति विद्यादेवी भण्डारीसँग छलफल गरेका छन् ।

आज बस्ने मन्त्रिपरिषद बैठकले सर्वाेच्चको आदेश बमोजिम दिएकै समयसीमा भित्र बस्नेगरी संसद्को अधिवेशन आह्वान गर्न सिफारिश गर्नेछ । प्रधानमन्त्री ओलीले संसद् अधिवेशनका लागि फागुन २३ गतेको मिति तय गरेका छन् ।

सोही बमोजिम निर्णय हुने पनि स्रोतको दाबी छ । साथै, यसअघि निर्वाचनका लागि तय गरिएको मिति र कार्यक्रम स्थगित गर्ने निर्णय समेत गरिने छ । सर्वाेच्च अदालतले प्रतिनिधिसभा पुनस्थापना गर्ने निर्णय गरेपछि आज पहिलो पटक मन्त्रिपरिषद बैठक बस्न लागेको हो ।

हिजो साँझ मात्र प्रतिनिधिसभा पुनःस्थापनापछि प्रधानमन्त्री ओली अचानक राष्ट्रपति विद्यादेवी भण्डारीलाई भेट्न शितलनिवास गएका थिए । यद्यपि के के विषयमा छलफल भयो भन्ने खुलाइएको छैन । आजको बैठकले प्रतिनिधिसभाको बैठक आह्वानका लागि राष्ट्रपति विद्यादेवी भण्डारीलाई सिफारिस गर्न सक्ने संभावना रहेको छ ।

राजीनामा दिन चौतर्फी नैतिक र राजनीतिक दवाव बढिरहेका बेला प्रधानमन्त्री ओलीले मन्त्रिपरिषद् बैठकमा के आकस्मिक निर्णय गर्नसक्ने पनि अनुमान गर्न सकिन्छ । तर प्रधानमन्त्री ओली कुनै हालतमा राजीनामा नदिने मनस्थितिमा भएको बताउदै आएका छन् ।