देउवा –राजदूत भेटघाट

१४ फागुन, काठमाडौं । सर्वाेच्च अदालतले प्रतिनिधिसभा विघटन गर्ने प्रधानमन्त्री केपी ओलीको निर्णय बदर गरेपछि विकसित तरल राजनीतिक वातावरणबीच विदेशीहरुको सकृयता तीब्र हुन थालेकोछ । चीन तथा भारतीय कूटनीतिक नियोगको चलखेल बढ्न थालेको छ ।

चीन र भारतका राजदूतहरु राजनीतिक परिस्थितिको आंकलन गर्न नेताहरुसँग भेट गर्न उत्सुक देखिएका छन् । संसद् पुनस्थापनापछि सरकार परिवर्तन हुने वातावरण देखापरेकै बेला उनीहरुले नेकपा र नेपाली कांग्रेसका नेताहरुसँगको भेटघाट तीब्र बनाएका छन् ।

हिजो मात्रै चिनियाँ राजदूत होउ यान्छीले नेकपा अध्यक्षद्वय पुष्पकमल दाहाल ‘प्रचण्ड’ – माधवकुमार नेपाल र नेपाली कांग्रेसका सभापति शेरबहादुर देउवासँग बेग्ला बेग्लै भेट गरेकी थिइन् ।

यस्तै नेपालका लागि भारतीय राजदूत विनयमोहन क्वात्राले पनि हिजो नै देउवालाई बूढानिलकण्ठस्थित उनकै निवासमा गएर भेट गरे ।प्रतिनिधिसभा पुनस्थापना भएपछि नयाँ सरकार बन्ने तयारी भइरहेको छ ।

यसैक्रममा देउवालाई नयाँ प्रधानमन्त्री बन्न नेकपाका दुबै पक्षले प्रस्ताव गरिसकेका छन् । तर कानूनी रुपमा विभाजित भइनसकेको नेकपाको आधिकारिकता नटुंगिएसम्म कांग्रेसले प्रष्ट धारणा बनाउने निर्णय गरेको छ ।

हिजो दुबै राजदूतहरुले नयाँ सरकार निर्माण प्रकृया र नेपाली कांग्रेसको धारणाबारे सभापति देउवासँग जिज्ञाशा राखेका थिए ।