सरकार र चन्द समूहबीच वार्ता असहज

१४ फागुन, काठमाडौं । सरकार र नेत्रविक्रम चन्द नेतृत्वको नेकपा बीचको वार्ता प्रभावित भएको छ । संसद पुनस्स्थापनासँगै सरकार र  चन्द नेतृत्वको बीचको वार्ताको वातावरण प्रभावित भएको हो ।

पुष ५ संसद विघटनपछि सरकारले चन्द समूहसँग वार्ताका लागि प्रयास थालेको थियो । तर, सर्वोच्च अदालतले फागुन ११ मा संसद पुनस्थापना गरेसँगै विकसित राजनीतिक घटनाक्रमपछि सरकार र चन्द समूह दुवै पर्ख र हेरको रणनीतिमा लागेपछि वार्ताको वातवरण प्रभावित भएको हाे ।

सरकार र चन्द समूहबीच वार्ताको वातवरण बनाउने गृहकार्य असहज भएको छ । संसद पुनस्स्थापनापछि केपी ओली नेतृत्वको सरकारको ठाँउमा नयाँ सरकार बन्ने सम्भावना चन्द समूहले देखेपछि उसले वार्तालाई हतारको विषय नबनाएको बताइएको छ । पछिल्लोपटक प्रधानमन्त्री ओलीले प्रजातन्त्र दिवसका दिन फागुन ७ मा नामै नलिई चन्द समूहलाई संवादमा आउन आग्रह गरेका थिए ।

फागुन ९ गतेपनि प्रधानमन्त्री ओलीले एक कार्यक्रममा चन्दसँग वार्ता हुन लागेको संकेत गरेका थिए । त्यसअघि चन्दले शनिबार विज्ञप्ति निकालेर सहज वातावरण बनेमा आफ्नो पार्टी नेकपा सरकारसँग वार्ताका लागि सकारात्मक रहेको बताएका थिए ।

माघ २० गते मात्र सरकारका तर्फबाट खानेपानी मन्त्री मणि थापाले नक्खु जेलमै पुगेर चन्द समूहका नेता हेमन्तप्रकाश ओलीसँग भेट गरेका थिए । पछिल्लो पटक पुष २९ मा चन्द समूहका अन्तर्राष्ट्रिय विभाग प्रमुखसमेत रहेका नेता धर्मेन्द्र बाँस्तोला पक्राउ परेका थिए ।