ओली सांसदहरुसँग छलफल गर्दै

१४ फागुन, काठमाडौं । सर्वाेच्च अदालतले प्रतिनिधिसभा व्यूँताइदिएपछि प्रधानमन्त्री केपी ओली नयाँ रणनीति बनाउँदै अगाडि बढिरहेका छन् । उनी यतिबेला प्रचण्ड–माधव पक्षको भावी कदम हेरेर मात्रै अगाडि बढ्ने मनस्थितिमा रहेका छन् ।

उनले आफूनिकट सांसदहरुसँगको भेटघाट पनि तीब्र बनाएका छन् । यसैक्रममा ओलीले आज प्रदेश नं. १ का आफूनिकट सांसदहरुसँग सरकारी निवासमा छलफल गरेका छन् ।

संसदीय दलका नेतामा आजै नियुक्त भएका विशाल भट्टराईका अनुसार, आज प्रधानमन्त्रीले प्रदेश नं. १ का सांसदहरुसँग भेटी समसामयिक राजनीतिक अवस्थाबारे छलफल गरे ।

संसद अधिवेशन आह्वान गर्न सिफारिश गर्ने संकेत गरेको जानकारी दिंदै भट्टराईले भने– प्रचण्ड र माधवजीहरु कसरी प्रस्तुत हुन्छन् सोही बमोजिम प्रधानमन्त्री पनि अगाडि बढ्ने हो । यसैगरी भोलि विहान पनि ओलीले बाग्मती प्रदेशका सांसद्हरुलाई भेट्ने कार्यक्रम तय गरेका छन् ।