बालुवाटारमा ओली र वामदेवको भेटवार्ता

१४ फागुन, काठमाडौं । नेकपाको एकता अभियानमा लागेको दावी गर्ने नेता वामदेव गौतमले आज प्रधानमन्त्री केपी ओलीसँग भेट गरेका छन् । शुक्रबार दिउँसो २ः३० बजे बालुवाटार पुगेका गौतमले ओलीसँग करिब एक घण्टा कुराकानी गरेका हुन ।

भेटपछि सञ्चारकर्मीसँगको कुरामा एकताकै विषयमा छलफल केन्द्रित भयो । साथै, विकसित पछिल्लो राजनीतिक अवस्थाका बारेमा समेत कुरा भएको उनले बताए ।

पार्टी एकताका लागि नयाँ शीराबाट जान आफूले प्रधानमन्त्रीलाई समेत आह्वान गरेको नेता गौतमले बताए । तर आफ्नो प्रस्तावबारे ओलीले खासै टिप्पणी नगरेको जानकारी उनले दिए । यसअघि उनले अस्ती अर्का नेता पुष्पकमल दाहाल ‘प्रचण्ड’लाई समेत भेटेर यस्तै प्रस्ताव राखेका थिए ।

नेकपा दुई समूहमा विभाजित हुँदा आफू तटस्थ रहेको बताएका गौतमले बिहीबार प्रचण्ड-माधव समूहका अध्यक्ष पुष्पकमल दाहाल प्रचण्डसँग भेटवार्ता गरेका थिए ।

नेकपा विभाजन पछि गौतमले छुट्टै नेकपा राष्ट्रिय एकता अभियान शुरु गरेका छन् । संसद विघटन पछि विभाजित नेकपालाई फेरि एक बनाउन दबाव दिने उद्देश्यले गौतमले अभियान सुरु गरेको बताएका छन् ।