कांग्रेस सरकारमा जाने भन्ने बेमौसमी कुरा मात्र हुन : डा.कोइराला

१६ फागुन, काठमाडौं । नेपाली कांग्रेसका प्रभावशाली नेता डा. शेखर कोइरालाले कांग्रेसले यतिबेला सरकारमा जाने या सरकारको नेतृत्व गर्न लालायित हुनेखालका बेमौसमी कुरा गरेर हिडने बेला नभएको बताएका छन् ।

कांग्रेस नेता डा. कोइरालाले नेपाली जनताले पार्टीलाई ५ बर्षसम्म प्रतिपक्षमा बस्ने म्यान्डेट दिएको हुनाले अहिले नै सरकारमा जान हतार गर्न नहुने बताएका हुन् । सिंगो नेपाली कांग्रेसको ध्यान अब आउन लागेको पार्टीको चौधौं महाधिबेशनमा केन्द्रीत हुनुपर्ने समेत कोइरालाले बताएका छन् ।

‘हामी अहिले बेमौसमीको सरकारको खिचातानीमा पर्ने बेला छैन’, उनले भने, ‘हाम्रो काम भनेको नेपाली कांग्रेसले पार्टीको महाधिबेशन सम्पन्न हो । नेकपा अझै पनि बिभाजित भै सकेको छैन ।’ बिभाजन नभई नेकपाको एउटा गुटसँग कुम मिलाएर हिडनु नेपाली कांग्रेस जस्तो लोकतान्त्रिक पार्टीलाई नसुहाउने कोइरालाले बताए । उनका अनुसार नेपाली कांग्रेसले अहिले पर्ख र हेरको रणनीति अपनाउनु पर्ने बेला भएको छ ।

नेपाल निजामती कर्मचारी युनियन संघ मोरंगले बिराटनगरमा आयोजना गरेको बनभोज कार्यक्रममा सहभागि भएर आफ्ना भनाईहरु राख्ने क्रममा कांग्रेसका प्रभावशाली नेता डा. शेखर कोइरालाले सरकारले राजनैतिक आस्था र बिचारका आधारमा कर्मचारीहरुलाई दुःख दिइरहेको जनाए ।

उनले सरकारलाई लोकतन्त्र पक्षधर कर्मचारीहरुलाई बिचारकै आधारमा दुःख नदिन चेतावनी समेत दिएका छन् । कर्मचारी सधैं राष्ट्रको स्थायी सरकार भएकोले कर्मचारीलाई लोकतन्त्रको पक्षमा बिचार राखेकै भरमा दुःख दिने काम गरे कांग्रेस चुप लागेर नबस्ने बताए ।