नेकपा नेता पन्तविरुद्ध कोमल वली अदालत जाने

१६ फागुन, काठमाडाैं । नेकपा नेता रघुजी पन्तविरुद्ध राष्ट्रियसभा सदस्य कोमल वली अदालत जाने भएकी छिन् । अमर्यादित टिप्पणी गरेर आफ्नो मानमर्दन गरेको भन्दै वलीले नेता पन्तविरुद्ध मानहानीको मुद्दा दायर गर्ने भएकी हुन् । उनले आफू अदालत जाने तयारी गरिरहेको जानकारी दिइन् ।

नेता पन्तले पिडुँला देखाएका भरमा केपी ओलीले कोमल वलीलाई सांसद बनाएको टिप्पणी गरेका थिए । एक कार्यक्रममा मन्तव्य व्यक्त गरिरहँदा पन्तले कोमल वलीले साडी सारेर पिडुँला देखाउँदै पोइल जान पाम भनेपछि ओलीले उनलाई केन्द्रीय सदस्य र राष्ट्रिय सभा सदस्य बनाएको टिप्पणी गरेका थिए । पन्तले यसो भनिरहेको भिडियो अहिले सामाजिक सञ्जालमा भाइरल बनेको छ ।

भिडियोमा पन्तले २० औँ वर्ष संघर्ष गरेका, विवाह नै नगरी पार्टीमा योगदान दिएका महिलाहरुले कहिल्यै टिकट नपाएको तर गोडा पिडुँला देखाउँदै पोइल जान पाम भनेपछि कोमल वलीलाई केपी ‌‌ओलीले सांसद बनाएको बताएका थिए ।

वलीले पन्तमा मानव विकासका क्रममा बन्ने तन्तुहरु बीचमै रोकिएको टिप्पणी पनि गरेकी छिन्। वलीले पूर्विया दर्शनदेखि मानव विकासमा महिलाको उच्चसम्मान समाजको कसिमा उत्तीर्ण भएर भएको र प्रकृतिले नै महिला र पुरुषको समायोजन गरेको बताउँदै एकअर्काको आदर सम्मान विना समाजमा न्याय, समानता र विवेकशीलताको अन्त हुने पनि बताएकी छिन् ।