सिटिजन्स बैंकका डीसीईओ देवकोटाले दिए राजीनामा

१७ फागुन, काठमाडौं । सिटिजन्स बैंकका डेपुटी सीईओ बोधराज देवकोटाले राजीनामा दिएका छन् । चैत १ गतेदेखि लागू हुनेगरी देवकोटाले राजीनामा दिएका हुन् ।

२०७६ साल बैशाख १ गते देखि सिटिजन्स बैंकको डेपुटी सीईओ बनेका देवकोटाले नितान्त व्यक्तिगत कारण राजीनामा दिएको बताएका छन् । आफू भविश्यमा पनि नेपालको बैकिङ क्षेत्रमै रहने उनले जानकारी दिएका छन् ।

सञ्चालक समिति खासगरी अध्यक्ष राजनसिंह भण्डारीसँग मनमुटाव बढेपछि उनले राजीनामा दिएको चर्चा बैकिङ क्षेत्रमा चले पनि त्यसलाई उनले अस्वीकार गरेका छन् ।

उनी यसअघि सोही बैंकमा सहायक प्रमुख कार्यकारी अधिकृतको रूपमा कार्यरत थिए । देवकोटाले सो बैंकमा स्थापनादेखि विभिन्न पदमा रहेर नेतृत्वदायी भुमिका निर्वाह गर्दै आइरहेका थिए ।

बैंकिङ क्षेत्रमा एक अनुभवी बैंकरका रूपमा परिचय बनाएका देवकोटाले त्रिभुवन विश्व विद्यालयबाट वित्त व्यवस्थापन विषयमा स्नातकोत्तरसम्मको अध्ययन पूरा गरेका छन् । उनले काठमाडौँ विश्व विद्यालयबाट वित्त व्यवस्थापनमा एमफिल पनि गरेका छन् ।

उनीसँग बैंकिङ क्षेत्रमा करिब २५ वर्ष काम गरेको अनुभव छ । सिटिजन्स बैंक आउनुभन्दा पहिले नेपाल बैंक लिमिटेडमा महत्वपूर्ण ओहदामा रहेर काम गरेको अनुभव उनीसँग छ।