विप्लवसँग वार्ता गर्न गृहमन्त्रीको नेतृत्वमा समिति गठन

१८ फागुन, काठमाडौं । प्रतिबन्धित नेत्रविक्रम चन्द ‘विप्लव’सँग वार्ता गर्न सरकारले गृहमन्त्री रामबहादुर थापाको नेतृत्वमा वार्ता समिति गठन गरेको छ । दुई सदस्यीय समितिमा प्रधानमन्त्रीका परराष्ट्र मामिला सल्लाहकार राजन भट्टराई सदस्य छन् ।

सञ्चार तथा सूचना प्रविधिमन्त्री पार्वत गुरुङले वक्तव्य निकालेर ‘विप्लव’समूहसँग वार्ता गर्न समिति गठन भएको जानकारी दिएका हुन् । समितिका सदस्य तथा प्रधानमन्त्रीका परराष्ट्र मामिला सल्लाहकार राजन भट्टराईले समिति गठन भएको र चाँडै वार्ता थालिने बताए ।

सत्तारुढ नेकपाबाट दाहाल-नेपाल समूह अलग्गिएपछि प्रधानमन्त्री ओली चन्द समूहलाई मूल धारको राजनीतिमा ल्याउन लागि परेका छन् । दाहाल गुटमा रहेका मणि थापालाई खानेपानी तथा सरसफाईमन्त्री बनाएर ओलीले विप्लव समूहसँग वार्ता अगाडि बढाएका थिए ।

अनौपचारिक रुपमा थुप्रैपटक वार्ता भएपछि त्यसलाई पूर्णता दिन सरकारी वार्ता टोली गठन गरिएको हो । केही समयअघि विराटनगरमा आयोजित भेलालाई सम्बोधन गर्दै ओलीले विप्लवसँग वार्ता अघि बढाउने बताएका थिए ।

सोही दिन विप्लव समूहले वक्तव्य निकालेर सरकारले वार्ताको वातावरण बनाए वार्तामा बस्न तयार रहेको जनाएको थियो । चन्दा आतंक मच्चाउने, एनसेल टावरमा आगजनी गर्ने, चन्दा नदिए वा आफ्ना बारेमा अरुलाई सुराकी दिने भेट्टाएमा हत्या समेत गर्ने कार्यमा विप्लव समूह अगाडि बढेको थियो ।

तर पछिल्लो समय मुख्य नेताहरु धर्मेन्द्र बास्तोला, हेमन्तप्रकाश वली लगायतका नेताहरु पक्राउ परेपछि विप्लव समूहले सरकारसँग वार्ता गरेर मूलधारको राजनीतिमा आउन चाहेको बताएको छ ।