विप्लवले प्रकाण्डको नेतृत्वमा वार्ता समिति बनाउँदै

१७ फागुन, काठमाडौं । नेत्रविक्रम चन्द नेतृत्वको विप्लव समूहले सरकारसँग वार्ता गर्न समिति बनाउने तयारी गरेको छ । सरकारले गृहमन्त्री रामबहादुर थापा बादलको नेतृत्वमा  २ सदस्यीय वार्ता टोली गठन गरेपछि विप्लव समूहले पनि वार्ता समिति बनाउने तयारी गरेको हाे ।

विप्लव समूहका अनुसार सम्भवतः समूहका प्रवक्ता खड्गबहादुर विश्वकर्मा ‘प्रकाण्ड’को नेतृत्वमा समिति बनाइने तयारी छ ।  यसअघि पार्टी महासचिव विप्लवले वार्ताका लागि आफूहरु सकारात्मक रहेको भन्दै विज्ञप्ति नै जारी गरेका थिए ।

त्यसपछि सरकारले वार्ता समिति बनाएको छ । प्रधानमन्त्री केपी शर्मा ओलीले पटकपटक समूहसँग वार्ता गर्ने सार्वजनिक अभिव्यक्ति दिँदै आएका थिए ।