सांसदहरुलाई प्रतिनिधिसभा बैठकमा उपस्थित हुन् सर्कुलर

१९ फागुन, काठमाडौं । नेपाली कांग्रेसले आफ्ना सांसदहरुलाई काठमाडौं उपत्यका नछोड्न निर्देशन दिएको छ । मन्त्रिपरिषद्को सिफारिसमा फागुन २३ गते बस्ने प्रतिनिधिसभा बैठकका लागि उपस्थित हुनै पर्ने भन्दै कांग्रेसले यस्तो निर्देशन दिएको हो ।

‘शुक्रबार दलको बैठक छ त्यसको लागि अनिवार्य उपस्थित हुनको लागि सांसदहरुलाई सर्कुलर गरिएको हो,’ कांग्रेसकी सचेतक पुष्पा भुसालले भनिन् । संसद् पुनःस्थापनपछि पहिलो पटक बस्न लागेको प्रतिनिधि सभामा कांग्रेसको भूमिका कस्तो हुने र कसरी प्रस्तुत हुने भन्ने विषयमा शुक्रबार छलफल हुने भुसालको भनाइ छ ।

केही दिन अघि नेकपाको दाहाल–नेपाल समूहले पनि आफू निकटका सांसदहरुलाई काठमाडौँ उपत्यका नछोड्न निर्देशन दिइसकेको छ । प्रतिनिधि सभामा नेपाली कांग्रेसका ६१ सांसद छन् ।

सांसद् ६३ भएपनि पार्टीका उपसभापति विजयकुमार गच्छदार र मोहम्मद अफताब आलम निलम्बनमा परेपछि अहिले संसदमा उपस्थित हुनेको संख्या ६१ मात्रै छ ।