कांग्रेस सरकारमा जानुपरे आफ्नै नेतृत्वमा जान्छ : डा महत

२० फागुन,चितवन । नेपाली कांग्रेसका सहमहामन्त्री डा. प्रकाशशरण महतले सरकारमा जानुपरेमा आफ्नै नेतृत्वमा मात्रै जाने बताएका छन् । आज चितवनमा पत्रकारसँग कुरा गर्दै उनले यस्तो धारणा राखेका हुन् ।

उनले प्रतिनिधिसभा बैठक सञ्चालन भएपछि पार्टीले आफ्नो धारणा बनाउने बताउँदै सरकारमा जानुपरेमा आफ्नै नेतृत्वमा मात्रै जाने स्पष्ट गरे । उनले भने,“हाम्रो उपस्थितिविना सरकार बन्न नसक्ने अवस्था बन्यो भने आफ्नै नेतृत्वमा सरकारमा जान्छौँ ।” सरकार बनाउन कांग्रेसको आवश्यकता परेमा मात्र सरकारमा जाने उनले स्पष्ट पारे । नेपाल कम्युनिष्ट पार्टी (नेकपा) विधिवत् रुपमा एकै भएकाले अहिले नै कांग्रेसले धारणा बनाउने बेला नभएको डा. महतको भनाइ थियो ।

त्यस्तै नेत्रविक्रम चन्द समूह हतियार छाडेर शान्तिपूर्ण बाटोमा आउनु सकारात्मक भएको महतले बताएका छन् । उनले भने, “मूलधार र शान्तिको बाटोमा आउनु त ठीकै हो । सहमतिमा के कुरा छन् भन्ने चाहिँ हामीलाई थाहा छैन ।”