निकै लोकप्रिय खानाको परिकार मःम !

२१ फागुन, काठमाडाैं ।  अहिले नेपालको अधिकांश भेगमा चर्चित खाद्य परिकार हाे  मःमः । मःमः मन नपराउने मान्छे साहेत विरलै हाेलान् ।मःम भन्ने वित्तीकै धेरैको मुख रसाइहाल्छ । मःम निकै लोकप्रिय खानाको परिकार हो । मःमःको लोकप्रियतालाई लिएर भनाइ नै बनेको छ– मेन्यु हेर्यो हेर्यो लास्टमा मःम । अर्थात् खाजा घर, होटल, रेष्टुराँ जाने ग्राहकले मेन्यू हेर्छन् र अन्तिममा मःमः अर्डर गर्छन् ।

यो लोकप्रियता अहिले नेपालमा मात्र नभई संसारभर फैलिदै गएको छ । विश्वभर पुगेका नेपालीहरुले सञ्चालन गरेका होटल तथा रेष्टुराँमा मःमः अनिवार्य बनाइन्छ । नेपाल आउने पर्यटकहरु पनि मःमःका विभिन्न परिकारमा झुम्ने गरेका छन् । बजारमा विभिन्न स्वादका मःमः पाइन्छन ।

यसको सुरूवात राणा शासनकालतिर काठमाडौंमा भएको परम्परागत खाना सम्बन्धी जानकारहरू बताउँछन् । यद्यपि यो विषय विवादित छ । शैलीगत हिसाबले फरक भए पनि तिब्बतमा पनि समकालीन समयमा मःमःको विकास भएकोले तिब्बतले पनि यसमा दाबी गर्ने गरेको छ ।

नेपाली ममले काठमाडौं उपत्यकामा व्यावसायिकता सुरू गरेको भने झण्डै चार दशकमात्रै भएको छ । तर यो अहिले भारत, चीन, अमेरिका, बेलायत आदि देशमा समेत विस्तार भइसकेको छ ।

तिब्बतले मःमःलाई अघोषित रूपमा राष्ट्रिय खानाको जस्तै दर्जा दिएको चिनियाँ सञ्चारमाध्यमहरू लेख्छन् । दैनिक हुने खपतलाई हेर्दा नेपालले पनि मःमःलाई कम महत्व दिएको देखिँदैन ।

तिब्बतमा पनि नेपालमा जस्तै मःमः बनाउँदा बफ्याएर वा तेलमा फ्राइ गरेर पनि बनाउने गरिन्छ । अफगानिस्तानसम्म पनि मःमःको विस्तार भइसकेको छ । उज्बेकिस्तान जस्ता देशहरूले पनि मःमः बेच्ने गरेका छन् । यसरी यसले विश्व बजारमा आफ्नो उपस्थिति हासिल गरिसकेको छ ।