विश्व बैंकको ५६ करोड अनुदान पुतलीबजार नगरपालिकालाई

२२ फागुन, स्याङ्जा । विश्व बैंकले नेपाल सरकारलाई उपलब्ध गराएको ऋण सहयोगमध्ये पुतलीबजार नगरपालिकालाई ५६ करोड १२ लाख अनुदान प्राप्त भएको छ । नेपाल सरकारले शहरी विकास तथा भवन निर्माण विभागमार्फत शहरी शासकीय सुधार तथा पूर्वाधार विकास कार्यक्रमका लागि पालिकालाई अनुदान प्रदान गरेको हो ।

विश्व बैंकले प्रदान गरेको ऋण सहयोग नेपाल सरकारमार्फत पुतलीबजार नगरपालिकालाई अनुदान प्राप्त भएको पुतलीबजार नगरपालिका प्रमुख सीमाकुमारी क्षेत्रीले जानकारी दिइन् । नगर प्रमुख क्षेत्रीले अनुदानबाट पूर्वाधार विकास अन्तर्गत बाटो, नाला, विभिन्न सडकका स्तरोन्नति, बसपार्क, कृषि र हाटबजार लगायतका क्षेत्रमा काम हुने बताइन् ।

अनुदान प्रदानका लागि शहरी विकास तथा भवन निर्माण विभागका महानिर्देशक नवराज प्याकुरेल र पुतलीबजार नगरपालिका प्रमुख सीमाकुमारी क्षेत्रीबिच शुक्रबार सम्झौता पत्रमा हस्ताक्षर भएको थियो । नेपाल सरकारबाट प्राप्त सहयोग तथा अनुदान सन् २०२१ देखि २०२५ सम्म सक्नुपर्ने सम्झौतामा उल्लेख गरिएको छ ।

शहरी विकास तथा भवन निर्माण विभागले शुक्रबार १७ वटा पालिकासँग सम्झौता गरेको छ भने ३० वटा पालिकासँग सम्झौता गर्ने कार्यक्रम रहेको छ । यो ‘सफ्टवेयर ओरेन्टेड’ कार्यक्रम भएको पुतलीबजार नगरपालिकाका प्रमुख प्रशासकीय अधिकृत पुरुषोत्तम शर्माले जानकारी दिए ।