गल्वुबेँशीकी महिला टपरी गाँसेर आम्दानी गर्दै

२३ फागुन,  दमौली । व्यास नगरपालिका–१ गल्वुबेँशी निवासी सीता अधिकारी आजभोलि दिउँसोको समयमा टपरी गाँस्न व्यस्त छिन् । बिहानको घरधन्दा सकेपछि दिउँसोको समय मोबाइल चलाएर र टेलिभिजन हेरेर बित्ने गरेकामा उनलाई आजभोलि दिउँसोमा कमै मात्र फुर्सद हुन्छ ।

फुर्सदको समय सदुपयोग गर्दै अधिकारीले टपरी गाँस्न थालेकाे छ । जङ्गल गएर सालको पात टिपेर ल्याउने र टपरी गाँस्ने उनको आजभोलि दैनिकी बनेको छ । “पहिला पहिला यत्तिकै दिन बित्ने गरेको थियो, अहिले टपरी गाँस्ने कामले दिउँसो फुर्सद हुँदैन”, उनले भने, “समयको सदुपयोगसँगै आम्दानीको माध्यम बनेको छ ।”

नव आदर्श आमा समूहका १४५ जना महिलाले टपरी गाँस्न थालेको अध्यक्ष सावित्रा हड्खलेले जानकारी दिए । यहाँका महिलाले गाँसेको टपरी व्यास–२ कालिका मार्गमा रहेको ‘माँ अम्बे’ पूजा सामग्री उद्योगले खरीद गर्ने गरेको छ । उक्त उद्योग एक साता अगाडिबाट सञ्चालनमा आएको छ । “घरमै बसेर आम्दानी गर्ने स्रोत बनेको छ”, उहाँले भन्नुभयो, “महिलालाई उद्यमी बन्न सहयोग पुग्नुका साथै समयको पनि सदुपयोग भएको छ ।”

नेपाल घरेलु तथा साना उद्योग महासङ्घ महिला उद्यमी सभापति कल्पना गौलीले उक्त उद्योग सञ्चालनमा ल्याएको छ । महिलाले गाँसेको टपरी आफूले खरीद गरेर बजारमा बिक्री गर्ने गौलीले जानकारी दिए । उनका अनुसार आमा समूहले दैनिक एक हजार दुना टपरी उत्पादन गरेको छ ।

हाल बजारमा दुनाटपरीको राम्रो माग भए पनि स्थानीय सरकारका तर्फबाट भने यसमा सहयोग नभएको गौलीको गुनासो छ । “उद्योगमार्फत झण्डै पाँच सय महिलालाई रोजगारी दिने उद्देश्य रहेको छ, छिट्टै नै अगरबत्ती उद्योगसमेत सञ्चालन गर्ने लक्ष्य छ”, उनले भने।