विराटका यी धुरन्दरले आईपीएलअघि नै बनाए ४ शतक ?

२४ फागुन, काठमाडौं । भारतीय युवा ब्याट्सम्यान देवदत्त पाडिक्कलले एकदिवसीय क्रिकेटमा लगातार चार खेलमा चार शतक बनाएका छन् । उनले भारतमा जारी विजय हजारे ट्रफी एकदिवसीय क्रिकेट प्रतियोगितामा लगातार चार खेलमा चार शतक बनाएका हुन् ।

पाडिक्कलले चौथो शतक दोस्रो क्वालिफायरअन्तर्गत केरलाविरुद्ध पूरा गरे । उनले आज १ सय १८ बलमा १० चौका र २ छक्कासहित शतक पूरा गरेका हुन् ।

आईपीएलअघि २० वर्षीय पाडिक्कल उत्कृष्ट लयमा देखिएका छन् । उनी आईपीएलमा रोयल च्यालेन्जर्स बैंग्लोर ९आरसीबी०बाट आईपीएल खेल्छन् ।

पाडिक्कलले गत सिजनको आईपीएलमा आरसीबीका लागि सर्वाधिक रन बनाएका थिए । उनले डेब्यू आईपीएल सिजनमै १५ म्याचमा ४ सय ७३ रन बनाएका थिए ।

पाडिक्कल आरसीबीका लागि पनि ओपनिङ ब्याट्सम्यानको भूमिका निर्वाह गर्छन् । उनले जारी विजय हजारे ट्रफीमा सार्वधिक रन बनाउने सूचीको शीर्ष स्थानमा छन् । उनले ६ म्याच खेल्दा ६६० रन बनाइसकेका छन् ।

आईपीएलको खेल तालिका सार्वजनिक

आईपीएलको सिजन २०२१ को खेल तालिका सार्वजनिक भएको छ । आइतबार गरिएको खेल तालिकाअनुसार भारतमा हुने प्रतियोगिताको उद्‌घाटन खेलमा मुम्बई इन्डियन्स र रोयल च्यालेन्जर्स बैंग्लोर (आरसीबी)बीच प्रतिस्पर्धा हुनेछ । खेल चेन्नईमा हुनेछ ।

यो सिजनका खेलहरू अहमदाबाद, बेैंगलुरु, चेन्नई, दिल्ली, मुम्बई र कोलकता गरी ६ स्थानमा हुनेछन् । विश्वकै ठूलो क्रिकेट रंगशाला नरेन्द्र मोदी रंगशाला अहमदाबादमा प्लेअफका खेलका साथै फाइनल खेल हुनेछ । फाइनल खेल ३० मे मा हुनेछ ।

प्रत्येक टिमले समूह चरणमा चार भेन्यूमा मात्र खेल्नेछ । ५६ वटा लिग खेलहरु चेन्नई, मुम्बई, कोलकता र बेंगलुरुमा हुनेछन्। चार भेन्यूमा १०/१० खेल हुनेछन् । अहमदाबाद र दिल्लीमा ८/८ लिग खेल हुनेछन् ।