महिलालाई आर्थिक रुपमा पनि आत्मनिर्भर बनाउनुपर्नेमा नेतृ भुसालकाे जोड

२४ फागुन, काठमाडौं । नेतृ पम्फा भुसालले महिलालाई बेरोजगार भत्ता दिनुपर्ने बताएकी छन् । १११ औँ अन्र्तराष्ट्रिय श्रमिक महिला दिवसको अवसरमा आयोजित एक कार्यक्रमलाई सोमबार भुसालले सोमबार महिलालाई आर्थिक रुपमा पनि आत्मनिर्भर बताइन् ।

सोमबार १११ औं अन्तर्राष्ट्रिय नारी दिवसको सन्दर्भमा अनेरास्ववियूले आयोजना गरेको टेम्पो चालक महिला सम्मान कार्यक्रमलाई सम्बोधन गर्दै नेतृ भुसालले राजनीतिक अधिकारले मात्रै नपुग्ने भन्दै महिलालाई आर्थिक रुपमा आत्मनिर्भर बनाउनुपर्नेमा जोड दिइन् । महिलालाई पैतृक सम्पति माथिको अधिकार सुनिश्चित गर्नुपर्ने, घरेलु कामलाई आर्थिक उत्पादनको काममा गणना गरिनुपर्ने तथा बेरोजगार महिलालाई भत्ता दिएर संविधानले प्रदान गरेको अधिकारलाई सरकारले कार्यान्वयन गर्नुपर्ने उनले बताइन् ।

‘पैतृक सम्पति माथिको समान अधिकारलाई जीवन व्यवहारमा कार्यान्वयन गर्ने कुरा, घरेलु काम जो अहिलेसम्म आर्थिक उत्पादनमा जोडिन्न त्यसलाई आर्थिक उत्पादनको काममा गणना गरेर अनि त्यसको मुल्यबोध गराउने कुरा र रोजगारको ग्यारेन्टी र रोजगार दिन नसक्दा महिलाहरुलाई बेरोजगार भत्ता दिएर अनि आत्मनिर्भर र स्वतन्त्र ढंगले अगाडी बढ्नसक्ने अधिकारको संविधान र कानुनले ग्यारेन्टी गरेको छ’, उनले भनिन्,‘आर्थिक हिसाबले सबै क्षेत्रमा समान र आत्मनिर्भर बन्न सक्ने महिलाको स्थितिलाई सुनिश्चित गरेर मात्रै राजनीतिक लगायतका अरु सामाजिक, आर्थिक अधिकारका हामीले उपभोग गर्न सक्छौँ।’

महिलाहरुले ५० प्रतिशत अधिकार प्राप्तिको लागि आन्दोलन गर्नुपर्नेसमेत नेतृ भुसालले बताइन् । उनले ५० प्रतिशत भन्दा बढी संख्यामा रहेका महिलाहरुले सबै क्षेत्रमा ५० प्रतिशत भन्दा बढी अधिकार प्राप्तिको निम्ति आन्दोलन गर्नुपर्ने बताएकी हुन् ।