मंगलबार जसपाले बोलायो संसदीय दलको बैठक

२४ फागुन, काठमाडौं । जनता समाजवादी पार्टीले संसदीय दलको बैठक बोलाएको छ । मंगलबार सिंहदरबारस्थित संसदीय दलको कार्यालयमा दिउँसो एक बजे संसदीय दलको बैठक आब्हान गरेको हो । आइतबारबाट सुरु भएको प्रतिनिधिसभा बैठक फेरि बुधबारका लागि बोलाइएको छ ।

बुधबारको बैठकमा कसरी प्रस्तुत हुने भन्ने विषयमा छलफल गर्न दलको बैठक बोलाइएको बताइएको छ । समाजवादी पार्टी र राष्ट्रिय जनता पार्टी मिलेर जनता समाजवादी पार्टी बनेपछि अहिलेसम्म अहिलेसम्म दलको संयुक्त बैठक बसेको छैन ।

दुई पार्टीबीच गत बैशाख ११ गते पार्टी एकीकरण भएको हो । पार्टी एकीकरणपछि पहिलो पटक बैठक बस्न लागेकाले सोमबार पूर्व राष्ट्रिय जनता पार्टी र समाजवादी पार्टीका सांसदहरू छुट्टाछुट्टै छलफल गर्दै छन् । सर्वोच्च अदालतले ऋषि कट्टेल नेतृत्वको नेकपालाई आइतबार आधिकारिकता दिएपछि सत्तारुढ नेकपा एमाले र माओवादी केन्द्रका रूपमा फर्किएका छन् ।

त्यसपछि केपी ओली नेतृत्वको सरकार तत्कालिन माओवादी सांसदहरूले समर्थन फिर्ता लिएमा स्वतः अल्पमतमा पर्ने भएको छ । अब जसरी भएपनि गठबन्धन सरकार निर्माण हुने भएकाले त्यस विषयमा छलफल गर्न जसपाले दलको बैठक बोलाएको हो ।