आलु भित्र्याएर मनाए वालिङका महिलाहरुले अन्तर्राष्ट्रिय महिला दिवस

२४ फागुन, वालिङ । वालिङका महिलाहरुले आफ्नै उत्पादन भित्र्याएर अन्तर्राष्ट्रिय महिला दिवश मनाएकाछन् । वालिङ ८ को समाज सुधार बहुउदेश्यीय आमा समूहका सदस्यहरुले आफैहरुले सामुहिक रुपमा उत्पादन गरेको आलु भित्र्याएर दिवस मनाएका हुन् ।

वालिङको मूख्य बजारका ७० जना महिलाहरुको सक्रियतामा स्थापना भएको समूहले सामुहिक खेती अन्तरगत आलु खेती गरेको समूहका अध्यक्ष प्रेमकुमारी रेग्मीले बताइन् ।

दियालो संस्थाले उपलव्ध गराएको आलुको बिउलाई सामुहिक रुपमा लगाईएको र उत्पादन पनि राम्रो भएको संस्थाका सचिव ईन्दिरा गैह्रेले बताइन ।वालिङ उद्योग बाणिज्य संघ महिला उद्यमी समूहकी अध्यक्ष समेत रहेकी कविता भूषालले भनिन्, “सामुहिक रुपमा खेती गर्दा निक्कै आनन्द आएको छ । अब हामी यसलाई निरन्तरता दिन्छौं ।”

उत्पादन भएको आलु सदस्यहरुलाई नै बिक्री गरीने र समूहको कोष बृद्धि गरीने अध्यक्ष रेग्मीले स्पष्ट पारिन् । उनले थपिन् “आगामी दिनमा सामुहिक खेतीको लागि अरुको भर पर्नु नपर्ने अवस्थामा पुग्न हामीहरु लागि परेका छौंं ।”

वालिङ नगरपालिका र संयुक्त राष्ट्रसंघीय बिकास कार्यक्रम (युएनडिपी) को आर्थिक सहयोग तथा दियालो संस्थाको व्यवस्थापनमा वालिङमा सञ्चालित “कोभिड १९ उद्धार र सामाजिक आर्थिक प्रतिकार्य परियोजना” अन्तर्गत सो समूहले ५ रोपनी जग्गा लिजमा लिएर आलु खेती गरेको हो ।