ओलीका सारथी रामबहादुरहरु परे फसादमा

२५ फागुन, काठमाडौं । सर्वाेच्च अदालतले पूर्व एमाले र माओवादी केन्द्र पुनस्थापित गर्ने फैसला गरेलगत्तै प्रचण्ड–माधव समूह विघटन भयो । हिजो साँझ यो समूहले पेरिसडाँडामा स्थायी कमिटीको अनौपचारिक बैठक ग¥यो । अदालतको फैसलामा चित्त नबुझेपनि कार्यान्वयन गर्न वाध्य माधवकुमार नेपाललगायत नेताहरु एमाले पार्टीतिरै फर्कने निर्णयमा पुगे । सोही बमोजिम आजबाट नेकपा एमाले भित्रै रहेर आफ्ना विचार र सिद्धान्तमा बहस चलाउने पक्षमा नेताहरु पुगे ।

एमाले अध्यक्षसमेत रहेका प्रधानमन्त्री केपी ओलीलाई यो निर्णयले तत्कालका लागि ठूलै राहत दियो । तर नेता नेपाल लगायत ठूलै समूह फेरि पार्टीमा आउने अवस्थाले उनको टाउको दुखाई भने अझै बढेको छ । माधव नेपाल र झलनाथ खनालको खप्की सुन्नुपर्ने श्रृँखला फेरि सुरु हुने भएको छ । नेपाल ,खनाल लगायत बूढा नेता प्रचण्डसँग टाँस्सिएर रहुन् भन्ने ओलीको पनि चाहना थियो । तर यो फैसलाले ओलीलाई फेरि त्यही काउसो भिर्न बाध्य तुल्याएको छ ।

उता, पूर्व माओवादी केन्द्रका नेताहरु जो अहिले ओली निकट छन्, तिनका सन्दर्भमा भने ओलीलाई अर्काे झड्का परेको छ । संकटका बेला आफूलाई साथ दिने रामबहादुर थापा, टोपबहादुर रायमाझी ,लेखराज भट्टको संकटमोचन गर्ने अवस्था यतिखेर रहेन । त्यसैले माधव नेपालहरु भित्रँदा रामबहादुर थापाहरु बाहिरिने चिन्ता उनलाई परेको छ ।

यद्यपि ओली पक्षमा आएका पूर्व माओवादीहरु भने अब नफर्कने बताउँदै छन् । त्यसो हुँदा उनीहरुको पद जान सक्छ । माओवादीका तर्फबाट निर्वाचित यी सांसद्ले पार्टी छाडेभने कारबाही भोग्नुपर्ने हुन्छ । त्यस्तो अवस्थामा के गर्ने भन्ने चिन्ता स्वयं उनीहरुलाई नै परेको छ । गृहमन्त्री थापा आफ्ना सबै सहयोगी छाडेर ओली क्याम्पमा आएका छन् । अब ओलीसँगै रहँदाको हैसियत खुम्चिने उनले अन्दाज गरिसकेका छन् । ओलीले हिजो जस्तो एकलौटी गर्न सक्ने अवस्था नरहन सक्छ ।

किनभने माधव नेपालहरु पनि कमजोर अवस्थामा छैनन् । त्यसैले पूर्व माओवादी नेताहरु एमाले व्यूँतिएपछि पेलिने अवस्थामा पुग्न सक्ने देखिन्छ । रौतहटबाट निर्वाचित प्रभु साह र कैलालीका लेखराज भट्ट पनि अब नेता नेपाल र भीम रावलको राप र तापमा पिल्सिने अवस्थामा पुगेका छन् । आज प्रचण्डले पूर्व माओवादी केन्द्रको स्थायी कमिटी बैठक डाकेका छन् । उक्त बैठकमा उनले ओली पक्षमा लागेका नेताहरुलाई समेत बोलाएका छन् । बैठकमा जाने नजानेबारे अहिलेसम्म ठोस निर्णय भइसकेको छैन । तर आजको बैठकमा नजाने सोच सबै नेताले बनाएको बुझिएको छ ।

माओवादी केन्द्रमा नफर्कंदा धेरै क्षति पुग्ने नेता थापा, भट्ट र साह नै हुन् । खानेपानी मन्त्री मणिचन्द्र थापा र उर्जा मन्त्री रायमाझी भने त्यति ठूलो संकटमा नपर्न सक्छन् । मणि थापा कतैबाट निर्वाचित होइनन् भने रायमाझी चाहिं नेकपा माओवादी केन्द्रको उमेदवारका रुपमा अर्घाखाँचीबाट निर्वाचित हुन् ।