डा.शेखरद्वारा शर्माको निधनप्रति श्रद्धाञ्जली व्यक्त

२९ फागुन, काठमाडौं । नेपाली कांग्रेसका प्रभावशाली नेता डा. शेखर कोइरालाले बीबीसी नेपाली सेवामा रहि डेढ दशक भन्दा लामो समयसम्म पत्रकारिता गर्ने नेपालका वरिष्ठ पत्रकार सुशील शर्माको निधन प्रति गहिरो दुःख व्यक्त गरेका छन् ।

कोइरालाले स्व. शर्माको निधनप्रति श्रद्धाञ्जली र शोकाकुल परिवाजनमा भावपूर्ण समवेदनाका पुष्पगुच्छा अर्पण गरेका छन् । शर्मा बीबीसी. नेपाली सेवाको नेपालको प्रमूख सम्बाददाताको पदमा रही काम गर्दै २०११ को नोभेम्बरमा उक्त पदबाट राजिनामा दिएका थिए । यसका अलावा उनले त्यसभन्दा अघि द राईजिङ्ग नेपाल, द काठमाण्डौं पोष्ट र स्पटलाईटमा समेत काम गरेका थिए ।

वस्तुनिष्ठ पत्रकारिता गर्ने समकालिन पत्रकारहरु मध्येका थोरैमध्ये एक शर्मा पत्रकारितामा तटस्थतालाई आफ्नो पहिलो र अन्तिम लक्ष बनाउन सक्ने विलक्षण प्रतिभाका धनि थिए । नेपालमा स्वतन्त्र पत्रकारिताका नयाँ अध्याय भित्र्याउने शर्मालाई उनकै सहयोगीहरु पनि मुक्तकण्ठले प्रशंसा गर्दथे। खेल पत्रकारिताबाट आफ्नो व्यवसायिक पत्रकारिता जीवन शुरु गरेका शर्मा पछल्लो समयमा राजनैतिक विषयबस्तुमा आधारित पत्रकारितामा आफुलाई अब्बल साबित गराएका थिए ।

डा. शेखरले आफ्नो फेसवुक पेजमा लेखेका छन् “पत्रकार शुशिल शर्माको निधनको खबरले स्तब्ध र दुःखी बनाएको छ । नेपाली पत्रकारिता क्षेत्रमा उहाँले पुर्याउनु भएको योगदान हाम्रा सामु अविष्मरणीय छ। शोकाकुल परिवार एवं आफन्तजनमा समवेदना तथा स्व. शर्मा प्रति श्रद्धाञ्जली ।”